Ттигъанну Ххюлуссуннал шяраву хьунни волейболданул турниргу, спортрал цайми журардал бяст-ччаллугу. Вай хас бувну бия цалва пишакарсса бурж биттур буллай жан кьурван дурсса Лакрал РОВД-лул зузала Амсаруллагь Къунжуевлул, мукунма жагьилсса оьрмурдай аьпалул хьусса, шяравугу бусрав-сийлий бивкIсса Наби Акаевлул ва Тимур Миллиновлул аьпалун.

Спортрал шадлугърал сиптачиталну бия Ххюлуссуннал шяраваллил администрациялул бакIчи Сагъир Акаев ва школалул директор АбумухIсин Къимпаев. Спортрал шадлугърай гьуртту хьун, шяраваллил жяматрал чIарав бацIан бувкIун бия Избербаш шагьрулул бакIчинал хъиривчув Бахрам МахIарамов, вава шагьрулий полициялий зузисса Мурад Щахщаев, Лакрал райондалул администрациялий зузисса Ярагъи Дандамаев.
КIюрххил ссят 10-нний байбивхьуну, ахттакьуннин лахъи лавгунни спортрал бяст-ччаллу. АбумухIсин Къимпаевлул сакин дурну, дуклаки оьрчIал дянив хьунни спортрал эстафета. Хъиривра хьунни волейболданул турнир.
Гьарца гъинттул шяравун бучIайссар личIи-личIисса кIанттурдай ялапар хъанахъисса ххюлуссун. Гьашинурив хъиннува чIявусса бувкIун бия. Вайгу гьурттуну лавайсса даражалий хьунни спортрал мажлис.
Волейболданул турнирданий цалчинсса кIану бувгьусса командалун буллунни Кубок. Пут личавриву, турникрай кIункIу шавриву ва дуклаки оьрчIал дянивсса эстафеталул бяст-ччаллаву ххув хьуминнан дуллунни арцуйнусса бахшишру. Вайннул щаллушинна дурну дия Мурад Щахщаевлул, Бахрам МахIарамовлул ва Ярагъи Дандамаевлул.
Ххюлуссуннал шяравасса жагьилталгу буссар хIакьину СВО-лий, Ватандалул мурадру буручлай. Мукунминнавасса ХIажимурад Акаевлун ва Кьурбанисмяил Абачараевлун дуллунни Лакрал райондалул администрациялул чулухасса наградартту.
Кьурбанисмяил Амиров,
ш. Ххюлуссун