Сентябрьданул 7-нний оьрмулул 32 шин хьунтIиссия Хъусращиял шяравасса Гъазиев Алик Багьауттиннул арснан. 2022-ку шинал июньдалул 11-нний, оьрмулул 30 шин хьун ца-кIива барз ливчIун, жан дуллуссар Аликлул СВО-рай Запорожскаллал фронтрай. Ванияр чIярусса шиннардил хьхьичI цала шяравачу, шаэр Абачара ХIусайнаевлул цалла назмулуву чивчусса куццуй, «украин аьрщарай… жан дулун багьунни вин жагьилнува».

Жан дулун хьхьичI хьхьувай – июньдалул 10-нний, Аликлул хъунмасса хIал бувна буттащал гъалгъа тIий, тавакъю бувна цIуну дуллалисса къатрал суратру гьан дуван, цанма ци-бунугу хьуншиву бувчIлай буссияв къакIула.

Аьрасатнал Ярагъуннил гужирдал мотострелковый полкрал минометный взводрал чIивима лейтенант Алик Гъазиев увссар Хъусращиял шяраву 1992-ку шинал сентябрьданул 7-нний. 2007-ку шиная вайннал кулпат ялапар хъанан бивкIссар Кизилюртуллал райондалийсса ЦIусса Сулакь поселокрай. Калуга шагьрулийн ивзун, Алик цаппарасса хIаллай зий ивкIссар «Угра Керам» заводрай. Ва шагьрулиява лавгссар аьралуннаву къуллугъ буван. Къуллугъ буллай ивкIссар цал Воронежрай, яла – Москавуллал областьрай Наро-Фоминск шагьрулий.
2016-ку шиная шийнай Алик Гъазиев хъанахъиссия Аьрасатнал Федерациялул Ярагъуннил гужирдал контрактрайнусса къуллугърал боец. Гьуртту хьуссар Ухссавнил Ккавкказнаву буллай бивкIсса контртеррористический операциярттаву. Лайкь хьуссар аьралий наградарттан. Хасъсса аьралий операциялий ккаккан дурсса чувшиврухлу, Аьрасатнал Федерациялул Президент В. Путиннул указрайн бувну, Алик Гъазиев лайкь хьуссар Чувшиврул ордендалун (аьпалул хьуну махъ).
2022-ку шинал сентябрьданул 7-нний, Аликлун 30 шин хьунтIисса кьини, Хъусрахь хьу­ссар аьпалул митинг, шяраваллил спорткомплексрал чIирайн лархъссар мемориал ула.
Аликлул буттал ва ниттил – Багьауттиннул ва СахIил, ни­ттирссил, жул даврил уртакь Зулайхат Тахакьаевал ва махъсса гъанминнал оьрму июньдалул 11-нний бавчIуссар кIива бутIуйх: ца – хьул-умудирттал, чаннасса хияллал бувцIусса, вамур – къумашиврул, пашманшиврул къявхъа тIисса.
Жу, Зулайхат Тахакьаевал даврил уртакьтал, ванищал архIал буруккинттарай бикIайссияв СВО-рай билаятрал мурадру буручлай талатисса ванил ссил ва уссил оьрчIал ялув. Аликлул ватандалухлу жан дулуннингу, дуллуну махъгу, царагу кьини лях къаларгссар Зулайхатлул ванал цIа зумух къаларсъсса, ванищал архIал – жугу.
– Жун, Аликлул шанмагу ниттирссин, цаннилагу лякьлуя оьрчIгу къабивзун, Алик ххирассия жула арс куна. Ванал кулпат бувну 2 шин хьуна, амма оьрчI къавхьуна, цал – ла­хъисса хIаллайсса командировкардалшиврий ва учениярдалшиврий, хъирив – байбивхьу­сса СВО-ралшиврий. Аликлул бивкIулущал жул кулпат щаллуну ятин хьуну ливчIунни…
Алик оьрчIниява спортрахун агьну икIайссия, цIакь, гуж бусса жагьилну хъуна хьун ччай икIайва, аьраличув хьуншиврул. ОьрчIнийва икIайва аьра­лий ххуллу бугьансса хияллай, ванан­сса эбратнугу хьуна жул ссурахъу МахIаммад – полковникнал чиндалийн ияннин къуллугъ бувсса. Аликлун бувчIлай къабикIайва, циваннив чIявуми жагьилтал аьра­луннаву къуллугъ баврия махъаллил хъана­хъисса. Дагъусттаннаясса чIявуми жагьилтал аьралуннаву къуллугъ буван къабуцлацисса 2012-2013-ку шиннардий Алик хасну аьралуннаву къуллугъ буван уциншиврул лавгуна Калуга шагьрулийн. Махъ, Аликлул контрактрайсса къуллугъ язи бугьлагьи­сса чIумал, жу хIарачат бувссия му пикрилия махъаллил уван. Ахирданийгу, лахIан уван къавхьукун, ванал бувсса хIукму хIурматрай кьамул бувну, ванал чул бувгьуссия, – буслай бур Зулайхат. – Алик оьрмулува лавгун махъ кIул хьуна жун ванал цIумулий язва диркIшиву. Цалва ичIуваминнахь, гъан-маччаминнахь укунсса затру тачIав къабусайва. Ванал дус Руслан Дзерановлул буслай, хасъсса аьралий операция байбивхьусса чIумал Алик азарханалия дахьа итаавкьуну ивкIун ур, хIакинтурал увкумунийн бувну, цаппарасса хIаллай больничныйлий шава икIан аьркинну бивкIун бур. Амма Алик, кьянкьасса хIукмугу бувну, цащала къуллугъ буллай ивкIсса кIия жагьилнащал лавгун ур СВО-рал зоналийн. ДазучIан бияннин цивппа лавгун бия, тиччарив аьралий гьалмахтурал бувцуну бия. Гьай-гьай, ванал буттан ва ниттин ччай бия ва шавай зана хьуну. Амма Алик цалва кутIасса оьрмулул махъва-махъсса гьантлийн ияннин присягалийн хаин къавхьуна, – буслай бур Зулайхат.
– Цалва оьрму аьралий карье­ралуцIун бавхIуния махъ Аликлун кулпатравуминнащал гьан дувансса чIун диял хъанай къа­дикIайва, мудана аьрххи-хху­ллурдай, полигоннай, учениярдай ия. Алик увкIсса чIумаллив ванан цаннагу, жун цинявннангу дикIайкунсса байран шайва. Алик дукралий бигьасса икIайва, унугу, на хIарачат буллан бикIайссияв ванан яла ххирами дукрарду дуллан. Жугу, ва цувагу хияллай бикIайссияв архIал ххишаласса чIун гьан дуллан.
ЦIусса шин дучIан хьхьичI Аликлул жун хъуннасса бахшиш дуруна – ссихI-чIитI дакъа увкIуна шавайн цалва кулпатращал, цинявнналагу цачIу, ххарину хьунадаркьуссия ЦIушинал байран. Январьданул 5-нний тIурча, Алик зана хьуна Владикавказрайн. Ххишала жун ва ккагу-къаккавкссар, – буслай бур СахIив, гужирай макьгу дугьлай. – Февральданул 26-нний Алик ва ванал дустал бивну бия спецоперация нанисса кIанайн. Барз ххишалагу хьуна ванал оькъавтIий, чикъачлай, связьрайн къауклай, Мариуполь шагьрулухлусса къизгъинсса талатавурттавух гьуртту хъанай. Ахиргу, дахIаврийн увксса чIумал, цува ваца дахьа лахьхьу ккавксса куна, цанна ккарксса, цалла дурхIусса захIматшивурттая махъвагу къаувкуну, цичIав ба­къасса куна гъалгъа тIий ия. Ватсаправу дучIайва сообщенияртту, суратру, цал-цал гъалгъа бувангу шайва, ук-тук видеосвязьрайнгу уккайва. Цува чара бакъа шавайн занаикIантIишиврий жул дакIру кьянкьану дацIан дуллай ия. Апрельданул ахирданий Алик­лул нюжмар дуруна дахIаврийн къауклай. Майрал 3-нний оьвкуна, ттухь нава бувсса кьини барча дуван, ххал буварча – махъва-махъ. Жан дулун хьхьичI хьхьувай – июньдалул 10-нний, Аликлул хъунмасса хIал бувна буттащал гъалгъа тIий, тавакъю бувна цIуну дуллалисса къатрал суратру гьан дуван, цанма ци-бунугу хьуншиву бувчIлай буссияв къакIула. ЦIусса къатри цаллая дуллай усса, жухь ца къуруш дула къаувкуну.
ТтучIан гьан дуруна «голосо­вой». Амма ттулмур сообщение цалла къатIиртIуна, къа­тIир­тIунарар лирчIссагу… Июньдалул 11-сса кьини Аликлущалсса дахIаву дурцссар. Га кьини ттул къинттуллухун ца аьжаивсса къюву дуллуна. Ххал буварча, муна му чIумал ттул Аликлул къинттуллувух снаряд дурххун диркIун дур. Арснал бивкIулия къакIулну гьантри хьуна. Июньдалул 14-нний жул къатлувун бувкIуна оьсса хавар. Военкоматрал зузалтрал, нузайн кьутI куну, цив ДНК ласун бувкIшиву бусайхту, ттул къюкI чарийн дурккуна. Амма, ливтIуминнал сияхIрай Аликлул цIа дакъахьувкун, хъинмунийн­сса хьул-умудгу бия. Духкъалагайсса нюжмар хьуна жул арсная цичIав хавар-тIавар бакъа. Июньдалул 18-нний тIурча, лавсун бувкIуна арс…
АрхIал къуллугъ буллалиминнал бусаврийн бувну, га бала-апатIсса кьини Алик аьралий дустуращал архIал зана хъанай ивкIун ур заданиялия. Ялун буруган, мурахас дурсса, марцI дурсса территориялий душманнал луркIан дурну диркIун дия. Алик ххассал хьунссар тIисса хьул-умуд къабивкIун бия, снарядрал цIалцIи тIайланна ванал бакIравун дурххун дия. ИвкIуну махъ кIива барз ва бачIи хьуну ванан 30 шин хьуссар. Алик икIайва щалва кулпатрансса ттарцIну, вихшаласса чувну, цинявннан ка-кумаг буллай икIайва – иширайнугу, дакI даврийнугу. Аликлущал архIал къуллугъ буллай бивкIминная цикссагу хъин-хъинсса махъру бавунни ва ивкIуну махъ. Ттигу-шилагу вай жучIан оьвтIийри бусса, жу къакьабивтун, хъамакъабивтун, бугу-бучIайссар жучIан – буслай бур СахIив, Виричувнал нину.
Ва ларгсса гъинттул, Аликлул нитти-буттачIангу биян, Хъус­рахьхьун ванал гьаттайнгу би­ян, бувкIун бия Волгоградраясса аьралий дустал. Ваниннин мукуна ванал гьаттайн иян Владикавказрая увкIун ивкIссар сержант Хетаг Кисиев.
– На Аликлущал кIул хьура 2016-ку шинал май зуруй. Ва чIумал «Тарское» полигондалийн бувцуну бувкIуна цIусса контрактниктал, вайннавух – Аликгу. ДакIнил хъинсса, иминсса, пахру-ххара бакъасса жагьил най уна итталун агьлай ия. Лагма-ялттуминнал ваначIансса хIурмат хъунмасса бия. Ттун ттулва оьр­мулуву чIярусса хаиншавуртту ккаркссар. Аликрив ия дакI тIайласса, вихшала дишинсса дус, – тIий ур Хетаг.
Запасрайсса офицер, аьралий эксперт Олег Марзоев:
– Алик Гъазиев, минометрал наводчик, чIивима лейтенант, аьралий профессионал, аьралий иширттал ветеран, спецоперация байбивхьусса цалчинсса ссятрайва айивхьуну, талай уссия Владикавказуллал пехоталул кьюкьраву. Ва ия нигь дакъасса, виричувсса жагьил. Шанма барз ва бачIи бувссар ванал га яла цIу кIириний. Ва кунмасса боецтурал дурсса виричушивурттал кьадру жунма щаллуну бувчIинтIисса так чIумувунни. Аликлул виричунал кунна дуллуссар жан, щаллуну биттур бувну цалва аьралий буржгу. Ттуршуннал багьасса талатала икIайва…
Азамат Макиев:
– Аликлуя ванащал архIал къуллугъ буллай, талай бивкIминнал дакIурдиву личIантIиссар анжагъ яла чаннами, яла хъинми дакIнинбичавуртту. Ва ия ххаллилсса солдат, хIакьсса талатала. Ва ия икIайкунсса дус, щаллуну вихшала дишин бучIисса. Жу, АьсатIиннавасса талаталт, ца кулпат кунма бикIайссияв, Аликгу ва кулпатрал ца бутIану икIайссия. Жу Аликлун аьсатIин маз лахьхьин буллай бикIайссияв, чIал къавхьуну ванан бувчIлан бивкIуна жу ссая гъалгъа тIу­тIиссарив. Аликгу жухь буслай икIайва цалла оьрчIшиврия, Да­гъусттанная.
Урузмаг Езеев:
– Аликлул оьрмулул хъуниминнащалгу, мюрщиминнащалгу ца маз лякъайва. Арулла шинавусса ттул арснан, Азаматлун, Алик тачIав хъамакъаитай. Аликлул ва цащала мудан футболданийн уцайва, ванащал хъинну хIалану икIайва. Ттигъаннурив Азаматлул, ттул аьралий яннагу цайнна ларххун, автоматгу канил бувгьуну, цув хIадурну ура тIива дяъвилийн ачин, Аликлухлу кьисас ласун.
Рем Сакиев:
– На роталуву яла чIавама ияв. Контрактрайну буллалисса къуллугърал цалчинсса гьантрайва Аликлул ттул ца хъунама уссил кIану бувгьуна, ттун муданнагу щуркIал хъанай дикIайва ванал ттухарасса аякьа. Аьралий ишру нанисса кIан­ттайрив на ванал янналувуяв икIайсса. Ванал хIурмат хъунмая командованиялучIагу, архIал къуллугъ буллалиминначIагу.
Аликлуя макь дакъа ихтилат буван хъанай дакъар чIаххувщар Аминат ХIамидовагу:
– Цуми чIаххувран ци кумаг аьркинну бурив – микку Алик уссия чара бакъа. Ванияр чIярусса шиннардил хьхьичI Аликлул, цалва оьрмулунгу, цIуллу-сагъшиврунгу нигьачIаву дуруна, Сулакьрайсса неххавун оькьлакьисса оьрчI ххассал увссар. Га чIумал цахьва «вин оькьлакьима ххассал аврихлу паччахIлугърал награда дагьлагьиссар» тIутIиминнахь Аликлул увкуна: «На награда ласуншиврул ххассал уллай акъассия оьрчI», – куну. Хъиривмур кьинирив Алик лавгуна Калугалийн. Ванахь барчаллагь учин къавхьусса чIаххувоьрчIрив ялагу хъунмасса хIаллай укIлай икIайва, Алик та учIантIиссар тIий цIухлай.
Аликлун ва ва кунмасса цаймигу жагьилтуран бивкIу ба­къассар…

Бадрижамал Аьлиева