Ларгсса бигьалагай кьинирдай Дагъусттанал бакIчи Федор Щукин ивунни Дарбантуллал райондалул Мамедкъалаллал шяравун, тIабиаьтрал апатIрал зараллу бивминнан къатри даврил тагьар ххал дуван.

Къатри дуллай бур архIала кIива кучалий шанна кьюкьлуй. Давурттайн кIункIу бувну бур ялун ххи бувсса бригадар­тту. Проектрай ккаккан бувну бур дуван 120 квадрат метралул лагрулийсса ца зивулий­сса къатри. Подрядчикнал дузал бантIий бур кучарду ва ххуллурду, участокрачIан дияннинсса циняв коммуникацияртту ва виваллил разводка.

Гъинтнил кIиришиврухгу къабурувгун, давуртту гьарца кьини щириркIуну най дур кIюрхнил ряхра сcятравату маркIачаннил арулла хьуннин. Прораб Хайбулла Давудовлул бувсунни: «Бригадарттаща хъанай бур цила чIумал бартдигьлан давуртту: бур аьркинссаксса зузалт, дур гьасса техника. Нюжмардул хьхьичI так ца къатлул гьану бивзун буссия, хIакьину тIурча 16 къатлул гьанурду хIадурну бур, цаппара гьантрава уттигу 10 къатлул гьану бизанну. ЖуцIун кабакьлай бур кIанттул ялапарлувтурал, жун ларсун бучIай щин, дуканмур. Жул давурттах къулагъас дуллай бур республикалул каялувчитурал. Укунсса ара дусса чIумал ччимур даву бакIуйн дуккан дуван шайссар».
Къатри даврил хIалкьазия ххал диргьуну махъ Федор Щукиннул дунни оператив батIаву. Муний гьуртту хьунни муниципалитетрал вакилтал, застройщик ва ресурсоснабжениялул идарарттал каялувчитал. Микку ххал бивгьунни къатри цила чIумал коммуникациярттацIун дазаврил масъалартту, инсантураща бюхъаншиврул дяркъу дагьаннинма гъилисса къатраву яхъанан.

«ЦIакь дурну дур строительствалул давурттал балжи­сса график. Жула мурад бур яла кутIасса чIумуй къатригу дурну, миннучIан дуцин аьркин­сса коммуникацияртту. Зарал бив­сса инсантал цIусса къатравун бизан баву жула хьхьичIсса агьаммур масъалар. Ххуллу, чани буцаву, жяматийсса зона ва хъун бакъасса щюллисса парк – ми гьармур дузал дуван аьркин­ссар яла гъансса чIумал. Давур­ттал ялув бацIаву дуллантIиссар муданна», – увкунни региондалул каялувчинал.

Газрал дузал баврил тагьардания бувсунни «Газпром газораспределение Дагестан» идаралул гендиректорнал хъиривчу Шамсуттин Аьлиевлул. Ванал бакIрайн лавсунни цинярда давуртту дузал дувантIий бушиву ккаккан дурсса чIумал ва бувсунни цIанасса ппурттуву тагьар цукунсса дуссарив. Аьлиевлул бусаврийну, газрал турбарду бихьлантIий бур стротельствалул давурттащал архIал догазификациялул программалул лагрулий. Газ буцинтIий бур 114 мм диаметралул лахъсса давлениялул газрал турбалувух. Газрал турба базинсса кIанугу хIадурну бусса бур.

«Газрал луртан хIадур дурну дур. Утти ялугьланну администрациялиясса заявкалух. Лахъи лаган мадулларду. КIира нюжмар – му хъинну тIайласса чIунни. Микку гьармур архIал дуллан аьркинссар: техникийсса давурттугу, документру дузал бавугу. Давуртту хIурхIа лаган дансса сававртту чIалай дакъар», – увкунни Федор Щукиннул.
Ххал бивгьунни цаймигу коммуникацияртталми масъалартту. Токрал дузал баву мурадрай дузал бувну бур цIусса трансформаторданул подстанция. Щинал дузал баншиврул хIадур дурну дур цIусса скважинартту, цаппара кIанттурдай щинал турбарду дуллалисса къатрачIангума буцлай бур.