Июньдалул 5-нний МахIачкъала шагьрулул Турали микрорайондалий хьунни Ватандалул мурадру буручлай ивкIсса Виричувнал аьпа абад буллалисса мажлис. Ва кьини аьпалул ула тIиртIунни ва Турали микрорайондалийсса кIичIираваллин дирзунни хасъсса аьралий операциялий къучагъшиврий жан дуллусса, Къайтагъуллал райондалиясса Микаиллул ва Хъусращиял шяравасса Зареттал арс, хъунама лейтенант ХIамзат Мирзаевлул цIа.
ДакIнийн бутанну, Дагъусттаннал бакIчи Сергей Меликовлул сипталийн бувну, республикалул шагьрурдай ва районнай най дуссар СВО-лий аьралий бурж бартбигьлай жанну дуллусса аьралийтурал аьпа абад буллалисса давуртту.
Виричувнал аьпа абад буллалисса мажлисрай гьуртту хьунни МахIачкъала шагьрулул мэр Юсуп Умавов бакIчисса делегация.
ХIамзат Мирзаевлул Красный Лиман шагьрулий хьусса оьсса талатавриву къучагъшиврий жан дуллуссар. Шикку ккаккан дурсса чувшиврун бюхттулсса кьимат бивщуну, Аьрасатнал президент Владимир Путиннул указрайн бувну, аьпалул хьуну махъ ПаччахIлугърал ларайсса награда — «Къучагъшиврул орден» дуллуссар.
Увну ур ХIамзат 1997 шинал январьданул 20-нний МахIачкъалалив. 2014 шинал МахIачкъалаллал 9-мур лицейгу къуртал бувну, дуклан увххун ур А.В. Хрулевлул цIанийсса Санкт-Петербургуллал Материал-техникалул дузалшиннарал аьралий академиялувун. Дуклакисса шиннардий, цурда-ца щилтагъшиву къадурну, низам дуну, хьхьичIунну дуклай, ванал ккаккан бувну бур цува вихшала дишин лайкьсса, унгу-унгусса аьраличу ушиву. Аьралий академиягу къуртал бувну бур ХIамзатлул марцIсса ххювардай. Ва къуртал байхту, жагьилсса аьраличу тIайла увккун ур Самаралийн взводрал командирну. Къуллугърал бурж марцIну биттур буллалисса жагьил ччяни итталун агьну ур.
2020 шинал хъунама лейтенантнал чингу дуллуну, ХIамзат ивтун ур Удмуртиянал Республикалийсса Кизнер шагьрулийсса 53701 аьралий частьрал инженер-штурмовой саперный взводрал командирну. Ванал каялувшиву дуллалисса взводгу яла итххявхми ва хьхьичIунми аьралийтал бусса бивкIун бур. 2021 шинал Тюменнай хьусса Аьрасатнал инженер аьралуннал дянивсса учебный соревнованиярттай цалчинсса кIану бувгьуну бивкIссар ХIамзат Мирзаевлул каялувшиндаралусса взводрал.
ХIамзатлул цIа чирчуну дуссар Владимирский областьрайсса Муром шагьрулий тIиртIусса, хасъсса аьралий операциялий жанну дуллусса аьралий хIаписартурал аьпа абад буллалисса марчарчарил улттуйгу.
2022 шинал январь зуруй роталул командирну тIайла увккун ур ХIамзат Украиннавун. Хасъсса аьралий операция нанисса цалчинсса гьантрая байбивхьуну, ХIамзатлул каялувшиву дуллалисса отрядрал барз ва бачIи бувну бур бацIаву дакъа нанисса талатавурттаву аьралий бигарду бартбигьлай. Тай диркIун дур яла къизгъинми талатавуртту нанисса чIунну. Шикку вай, душманнайн кьянкьану гьужумгу бувну, цIуллуну-сагъну махъунмай зана хьуну бур. Красный Лимандалий хьусса хъиривмур талатавриву бяливчIун бур къучагънал оьрму, язисса арснацIа, уссицIа хьуну бур нину-ппу, уссурвал.
ХIамзат Мирзаевлул чIавасса оьрмулий эбратну ва яргну бивтсса аьралий ххуллия бусласисса ихтилат бунни Юсуп Умавовлул. Барчаллагь увкунни пахрулунсса къучагъ тарбия увсса нитти-буттахь.
Ахирданий ихтилат бунни ХIамзатлул буттал, полициялул майор Микаил Мирзаевлул.
– ХIамзат ттул дянивма арсъя. 9 класс къуртал баннин хIакин хьунсса хияллай икIайва. Рязину бикIайссияв арсная хIакин хьунссар, ванал багьу-бизугу духтуртураха лавхьхьусса бур тIий. 10-мур классраву айивхьунни аьраличу хьунна тIисса ихтилатру гьаз буллай. ХIамзат, унгу-унгуну спортрахунгу агьну, цинярдагу нормативру биттур дуллай, цала хьхьичI бивхьусса мурад бартбигьлан ивкIуна. Ттуяту генерал хьун аьркинссар тIун икIайва. Цана цувалу лавгун, Санкт-Петербургуллал аьралий академиялувун дуклан увххуна. Ци чулийгу, арснал бувгьусса ххуллуцIун рязи хьун багьлай бия жунгу. Академиялуву дуклакисса шиннардий деканнал, оьвкуну, барчаллагь баян бувна, ххаллилсса арс тарбия аврихлу. Ванан хъинну ххирая аьралий форма, пахрулий икIайва вайннуя. Каникуллай шавай аьралий формалуву акъа къаучIайва. Цува дуклай ивкIсса школалийн учительтуращал хьунаакьин лагайва аьралий формагу ларххун. Арсная ци бусланссарив къакIулну ливчIун ура. ЧIивину унува кьянкьасса хасият дусса икIайва, – тIий, буслай ур Микаил.
Ванал барчаллагь увкунни арснал аьпа абад бан бувкIминнахь, чIарав авцIусса Юсуп Умавовлухь, цала кьини хъун дан бувкIсса цинявппагу инсантурахь.
Имара Саидова
