Вай гьантрай цила оьрмулул юбилей хьунадакьлай бур Республикалул офтальмологиялул азарханалул хъунама хIакиннал хъиривмур Аьбдуллаева Фатима Нариманнул душ.

Бувну бур Фатима 1960-ку шинал Ккуллал райондалийсса ЧIяйннал шяраву. Къуртал бувну бур МахIачкъалаллал шагьрулул 38-мур школа. Бувххун бур Дагъусттаннал паччахIлугърал медициналул институтравун. Ва къуртал бувну махъ зун бивкIун бур Липецк шагьрулий. Ординатура бувккуну бур Саратов шагьрулий.
Дагъусттаннайн зана хьуну махъ, Фатима Наримановна зун бивкIун бур Республикалул офтальмологиялул азарханалий хъунама хIакиннал хъиривмурну: 1996-ку шиная тIайла хьуну – сакиншиннарал ва методикалул даврил, 2003-ку шиная шинмай – хъин баврилмур даврил.

Цила даврил уртакьтуралгу, къашайшалтралгу дянив Фатима Наримановнал дур ххишала дакъа хъуннасса авторитет, ва цила даврил хIакьсса профессионалгу буну тIий, инсаншиврул ххуллийсса ххуй-хъиншиврул бутIагу аваданну бивсса буну тIий.

ДакIнихтуну бувсса захIматрайну Фатима Наримановнал хIалал дурну дур «Дагъусттан Республикалул лайкь хьусса хIакин», «Дагъусттан Республикалул ЦIуллу-сагъшиву дуруччаврил отличник», «Шинал язима офтальмолог» бусравсса цIарду ва цаймигу наградартту. Ванил щала кулпатва медициналул пиша язи бувгьусса бур.
Фатимал лас АхIмад Аьбдуллаевлул цIагу хъиннура машгьурсса дур республикалул медициналул дунияллий. ЧIярусса шиннардий ва зий ур Республикалул урологиялул центрданий ца яла хьхьичIунма ва тIалавма специалистну. АхIмадлул ва Фатимал арснал ва душнилгу язи бувгьуну бур нитти-буттал ххуллу, вай кIиягу хIакинталну Аьрасатнал хъуншагьрулий, Москавлив, зий бур.
Барча тIий Фатима Наримановнахь юбилей, чIа тIий буру ттигу чIярусса шиннардий зунсса, занансса, халкьуннан чани чан хьун къабитлансса цIакьсса цIуллушиву, кулпатраву нахIушиву ва барачатшиву, оьрмулиясса ххаришиву.

Бадрижамал Аьлиева