Оператив штабрал заседаниялий Дагъусттаннал ХIукуматрал председатель МахIаммад Рамазановлул личIинурасса къулагъас дунни паччахIлугърал властьрал ва кIанттул цилакаялувшиврул органнал инсантурал лабизавурттащалсса даву сакин даврих.

Министртурал кабинетрал бакIчинал тапшур бунни цила чIумал къулагъас дуллан инсантурал лабизавурттах, чагъардах, миннащал махъуннайсса дахIаву цIакь дуван, дагьайкунсса жавабру дуллан, давуртту бартдигьаврил низамрал ялув бацIлан.
«Ялапарлувтуращалсса да­хIаву – властьрал органнал мюнпатшиврул яла хъуними ккаккиярттавасса цар. Инсаннан личIишиву дакъассар, ганал масъала дузал баврил жаваб цумур идаралул дулунтIссарив. Га ялугьлай уссар балжисса жавабрах. Мунийн бувну, инсаннал чагъарданун анаварсса мутталий жаваб дулаву, ганащалсса дахIаву дузал даву ва даву бартдигьаврил низам (исполнительская дисциплина) махъ бакъа властьрал гьарца органдалул стандартну дикIан аьркинссар», – увкунни МахIаммад Рамазановлул.

Оператив штабрал заседа­ниялий ДР-лул БакIчинал ва ХIукуматрал Администрациялул каялувчи МахIач Оьмаровлул бувсунни инсантурал лабизавурттал мониторинграл хIасиллал ва ДР-лул паччахIлугърал властьрал ва кIанттул цилакаялувшиврул органнал инсантурал чагъардах къулагъас даврил хIакъираву. Ванал тIимунийну, июльданий Региондалул управлениялул центрданул «Инцидент-менеджмент» системалуву сияхIрайн ларсъсса лабизавурттал аьмсса аьдад хьуну дур 12 222, ми хъанай дур хьхьичIмур мутталийсса ккаккиярттах бурувгун 17 % ххишаласса.