Вай гьантрай Москавуллал областьрайсса Раменск шагьрулий хьунни чани бакъасса спортсментурал дянивсса дзюдорал чемпионат. Шикку 48 килорал кIушиврийсса спортсментурал дянив 1-мур кIану бувгьунни Ккуллал райондалийсса Ваччиял шяравасса Кьасимлул душ Аминат Оьмаровал. Чемпионатрай ххув хьусса душнин бахшишран дуллунни 100 000 къуруш ва Спортрал мастернал цIа.
Оьрмулул 8 шинаву оьрчIал багъраву хавар бакъулий хьусса цIунцIия сававну, ца лахIзалул мутталий, Аминатлул щала оьрму баххана хьуну бур. Мушакъатшиврул гъагъан къабувну, ва цила яхI бушиврул, кьянкьа-кьурчIишиврул цIуллу-сагъминнаяргу гьарица ишираву хьхьичIунну бур. Ванил цимилгу тасттикь бунни, ччан бикIарчан, дан къашайсса цичIар дакъашиву.
Аминат бувну бур 1999-ку шинал декабрьданул 19-нний. Дуклай бивкIун бур Избербаш шагьрулийсса 3-4-мур журалул хасъсса школалий.
ХьхьичIунсса хIасиллай 11 классгу къуртал бувну, дуклан бувххун бур Дагъусттаннал паччахIлугърал педагогикалул институтрал психологиялул факультетрайн. Институтраву ванил лавайсса даражалий дурурччуну дур дипломрал даву. 2021-ку шинал Аминат бувххун бур Кисловодск шагьрулийсса Медициналул колледжравун. Шикку лавхьхьуну бур массаж байсса квалификация дусса медсестранал пиша. ЦIана ванин дур 26 шин. Зий бур МахIачкъалаливсса Муххал ххуллул азарханалий массаж бувуну. Ванил бувай классикалул, спортрал, лимфодренажный, рефлекторный, косметический, точечный, мюрщисса оьрчIансса ва цаймигу журалул массаж.
2024-ку шинал Аминатлул бувккуну бур байбихьулул кIулшивуртту дулаврил дефектологиялул факультет.
Яруннал мушакъат хьусса ппурттуву машхул хьуну бур куклу атлетикалул, голболданул, дзюдорал, шашкардал, шахматирттал, мини-футболданул спортрахун. Ва ца минутIрайссавагу оьнма къабацIайссар, усттарну кIунурдай ва жанграй суратругу щащайссар.
МахIаттал-хIайран бувссар ванил цимилгу, республикалулгу, щалвагу Аьрасатналгу даражалийсса шахматирттал, дзюдорал ва жанграй щащаврил соревнованиярттай хьхьичIунсса кIанттурду бувгьуну. Аминатлул кIийлва 1-мур ва 2-мур кIану бувгьуну бур шахматирттал турнирдай.
Массажистну зий 2 барз шайхту, Кисловодскалий хьусса массажистътурал конкурсрайгу ванил 2-мур кIантту бувгьуну бур. Цуппа гьуртту хьусса конкурсирттай, чемпионатирттай ванил мудан хьхьичIунсса кIантту бугьай. Аминатлул бур музыкалул чулухунмайссагу гьунар.
Ванил оьрмулул ва захIматрал ххуллу эбратну бур жагьилсса никиран.
Имара Саидова
