Ирглийсса, нюжмардий цал шайсса, райондалул бакIчиначIасса батIаврий ххал бивгьунни жяматрал иширттан хас бувсса масъалартту.
Шикку кIицI бувна 2018-ку шинал райондалий кIива, Хъусращиял ва Ккуллал 1-мур школа, республикалул «100 школа» тIисса программалийн бувну бакьин бувшиву. Утти яржа бивну бушиву бувсуна шяраваллавусса культуралул къатригу бакьин буван. Ми республикалул программалийн ласуншиврул заллу ккаккан уллалисса чагъарду аьркинну бушиврия бувсуна райондалул бакIчи Рамазанов Шамиллул.
БатIаврий ялагу кIицI бувна кIулшиву дулайсса идарарттайсса медициналул кабинетирттан лицензия ласун аьркиншиву. Ххал бивгьуна мукунма энергохаржиран хас дурсса программартту дикIан багьлагьишиву.
БатIаврий райондалул бакIчинал бувсуна цала хIукму бувшиву ларгсса шинал шяраваллал администрациярттал налогру датIавриву ххину дуллуминнал бюджетрайн 2019-ку шинал арцу ххи дувантIишиву. Мукунсса администрацияну хьуну бия Ваччиял администрация. Вайннан ххи дурну дур 300 азарда къуруш.
