[dropcap]А[/dropcap]прель зурул 26-нний Ваччав хьунни Хъун дяъвилий жулла тархъаншиврухлу жанну дуллуми дакIнийн бичлачисса мажлис – «Вахта памяти». Шикку гьуртту хьунни уттигъанну цала къуллугърай цIакь хьусса Ккуллал райондалул бакIчи Рамазанов Шамил ва ванал хъиривми.
ХIажимурад ХIусайнов
[dropcap]Б[/dropcap]акIрайва АхIмад-Хан Султаннул гьайкалданучIа тIутIал шалкка бивхьуна. Ца оьрчIахь бия 1945-ку шинал Берлиннай бивщусса ттугълил копиягу.
Яла циняв лавгуна Ваччавсса культуралул къатрал хIаятравусса «Вирттаврал АллеялучIан». Шикку Вирттаврал суратирттачIа дирхьуна ххувшаврил лишанну хъанахъисса ятIул михакрал тIутIив.
Ххувшаврил байран барча дуллалисса махъру лавхъуна райондалул бакIчи Шамил Рамазановлул, Ветерантурал советрал председатель Аьбдул Загьидиевлул, УО-лул каялувчи Альбина ХIаммакуевал, Жагьилтурал центрданул каялувчи МахIаммад ХIусмановлул. Муния махъ райондалул чIявуми школарттал дуклаки оьрчIал ххуйну бувккуна Ххувшаврин хас бувсса шеърирду, увкуна балайрду, ккаккан дурна къавтIавуртту.
