БакIмахъ
Хъинну пикрирдай бивкIра, цумур материал дулун хъинавав тIий юбилейрал номерданийн. ЦIуххав ттуйннанияр вихшала дусса шама инсаннахь, зун ттул материаллава цумур дакIний лирчIри куну. КIиннал маслихIат бунни «Илчилул» сийлийсса федерал конкурсрай ларсъсса ххувшаврия бусласисса макьала дула, темагу лайкьри юбилейрал номерданийн, цурда макьалагу ххуйсса даражалий, хIазну, пасихIну чирчусса дия куну. МаслихIат барчаллагьращал кьамул буллай бура.
Цумур мурцIату байбишива? Цумур бухьурчагу, конкурсрайн макьалартту гьан дуллалийни, ххувшаврийн тамахI бакъанугу, «гьай-балики» тIисса хьул-умуд гьанай бикIай бакIраву. Гьамин ва «гьай-баликилул» гъира бувтун, гьан дурссия нагу щалвагу Аьрасатнал даражалийсса СМИ-рдал конкурсрайн ттулла «ххуржинтту». Ва Миллатирттал иширтталсса буллалисса федерал агентствалул (ФАДН) ва Межэтническая журналистикалул гильдиялул уртакьну баян бувсса конкурс бия. Миллатирттал, этносрал масъалартту гьаз буллалисса давурттал конкурс бухьувкун, гьан бувссия «ЧIимучIали» рубрика, ккуру риртссия чIярусса шиннардий гъирарай дуллай бивкIсса даврил гурга. Гьай-гьай, бувсъссия ниттил маз хъамабитаврил нигьачIаву цайми миллатирттаннияр лакран ххишаласса душивугу.
Нава конкурсрал финалданувун бувкшиву ва ттуйнма Москавлийн оьвтIий бушиву бусласисса чагъар бучIайхту, вих бакъагума бивкIра цал, тIайлабацIулул хъиривгу тIайлабацIу ялугьлай бушивруя хаварвагу бакъа. Конкурсрал церемониялийн оьвтIисса журналистка Надежда Жуковскаяхьгу буссияв, къабувкIун къабучIиссарив тIий. «КъабучIиссар, букъавкIунгу чара бакъассар», — увкунни. Нава конкурсраву ххув хьушиврийн гьимрагу къадунни, Москавлийнсса ва махъунмайсса билетгу, гостиницалухсса хIакьгу цайнма ласлай буру увкунни.
«Севастополь» гостиницалувун буххайхтува, «СМИротворец» тIисса улагу хьхьичI дирхьуну, жу хьунабакьлай бия конкурсрал сиптачитуравасса Анжелика Засядько. Хъунива-хъунисса яруннащалсса ванийн жу яла «ххуллу ккаккан бувай чаннацIуку» тIисса цIа дирзссия. Хъирив кьини кIюрххила жу ресепшнналучIан бавтIру. ЩябивкIру бучIан бувсса автобусрай. Та кьини Ломоносовлул цIанийсса МГУ-луву журналистикалул факультетрай филологиялул элмурдал доктор Андрей Вырковскийл «СМИ на краю пропасти: есть ли жизнь в цифре?» тIисса лекциягу бия, аьрасатнал СМИ-рдай этносирттал тематика аьч даврин хас бувсса «ккуркки столгу» бия. Цала тIийкун, «Единая Россиялул» заседаниялия ливхъун журналистътуращал хьунаакьин увкIуна ПаччахIлугърал Думалул национал иширтталсса буллалисса комитетрал председатель Илдар Гильмуттиновгу. Журналистътурал суаллахьхьун жавабру дулун увкIуна Аьрасатнал Прокуратуралул вакил Алексей Жафяровгу.
![](https://ilchi.info/wp-content/uploads/2021/01/fcr4stsgesy_2.jpg)
Аьдат бакъа, ттул бакI му кьини пIякь учавай цIун бивкIуна, информация чIявушиврул къагъ-байтурман хьуну бияв, ттун информациялул бакIу лаласун чIун аьркинну дия. Коллегахъул шагьрулувух буклан лавгуна, чIун дирирну дунура, нарив гостиницалинмай ака бувссия. Хъирив кьини жу экскурсиялий бувцунав бухзаманнул Москавлийн, Хъун мизитравун ва НукIузаманнул мизитравун ( ванийн «Историческая соборная» тIий бия, Хъунмур мизитрая личIи буван). Уттинин Москавлив мизитраву къавхьусса ттун, гьай-гьай, хъинну ччай бия ахттайн чак буван, амма инсантал ттухра къулагъас дуллали бувангу, ялугьлагьи бувангу ччай бакъая. Культуралул программалувух хIала хьуна хъирив кьини дайдишинтIисса медиафорумрайн бувкIмигу. Бувсуна балжийну тахшагьрулул тарихраягу. Ахттая махъ Москавуллал миллатирттал къатлуву Медиафорумрал лагрулий вара миллатирттал тема гьаз дуллалисса агьамсса ихтилатру хьуна. Саратов шагьрулиясса блогер Айвар Азаматовлул бувсунни казах маз лахьхьин буллалисса видеороликру буллай ушиву ютуб каналданий ва даврил дайдихьугу дуршиву хъуннабава гьурттусса видеороликрая. Гьай-балики! БакIрайва учавхха, «гьай-баликилул» гьуз учин увайсса ур куну инсан.
Нагу бусав жулва «Илчилул» бивтсса ххуллия, бусав оьрчIансса рубрикалия, миллатрал тарихрая ва хIакьинусса кьинилия. Гьай-гьай, бусан багьлай бия кутIану, аьщуйн щунну. Нагу хIадур хьуну буссияв кутIасса ихтилатраву чIявусса затру учин. Мяйжанссар, ххуй буван, баххана буван къашай ттуща ттулва лугъат. Лугъатрайсса бунугу, ттул ихтилат даши бивзун, Межэтническая гильдиялул хъунмур Маргарита Лянгел, «нанияра хъат рищуннуча ва душнил даврил хIурматран» куну, коммунистурал собраниялий кунма, хъатру ришлаши бувна. ЧIявуя ттухьхьун буллалисса суаллу. Коллегахъан ччай бия жулва жагьилтурал цими процент ниттил мазрай гъалгъа тIий буссарив, луттирдал, учебникирттал ци тагьар дуссарив кIул хьуну. Хакасиянал, Бурятиянал телевидениярттахьхьун интервьюрду дуллуссия.
![](https://ilchi.info/wp-content/uploads/2021/01/fcr4stsgesy_3.jpg)
Югорск шагьрулул тележурналистътурал шагьрулул агьулданухьхьун лакку мазрай ссалам булунгума бунна. Бия цайми журналистъталгу, радиоэфирданий лакку мазрайсса ца-кIира калима дува тIутIисса. Циняв, цума чассаяв дакIний личIлайвагу акъая. Тиккува, на ихтилат буллай бунува, Къалмукьнал журналистнал, «Калмыкия» РИА-лул директорнал хъиривчу Санал Шавалиевлул бувсуна ттигъанну Лакрал театр цачIанма бувкIшиврия, ххуйсса даражалийн гьаз хьусса театр бушиврия.
МаркIачIанмай жу «Манеж» тIисса выставкарду дувай централ залданувун бувцунав Хъун дяъвилул тема аьч дуллалисса суратирттал выставка ххал дуван. Аьрасатнал 34 шагьрулиясса 150 сурат дия ккаккиялун дирхьуну. Вера Мухинал, Павел Кориннул, Петр Кончаловскийл, Илья Глазуновлул ва цаймигу машгьурсса художниктурал дирхьусса, ябатIин къашайсса, асардал буран дакIнивух ппив буллалисса суратру. На дяъвилиясса киносурат макь дакъа ххал дуван къашайминнаватусса бура. Мунияту ттул дакI мукун къума ларгунахха, выставка ххал дурну мукьах, таксилий бачу жущал тIий бунува Къалмукьнаватусса коллегахъул, ттун бахьтта бачин ччай бия. Хъирив кьини жу регионнал ва миллатирттал шамилчинмур Медиафорумрайн лавгссияв. Тикку Аьрасатнал 57 региондалиясса 350 инсан гьуртту хъанай ия.
Ихтилатру бувна Миллатирттал иширтталсса буллалисса федерал агентствалул хъунама Игорь Бариновлул, МГУ-рал журналистикалул факультетрал декан Елена Вартановал, Аьрасатнал Журналистътурал союзрал хъунама Владимир Соловьевлул ва цайминнал. Дагъусттанная ва форумрайн увкIун ия «Новое дело» кказитрал хъунама редактор ХIажимурад Сагитовгу. Бия Миллатирттал къатлул итабакьайсса «Союз Национальностей» журналданул культуралулсса буллалисса хъунама редакторнал хъиривчу ПатIимат ХIаммадовагу. Шиккува, хIалу дагьну дунура, барчаллагь тIий бура ттула чIарату тинмай къахъанай чIарав бавцIусса ПатIиматлухь.
Медиафорумрал даву къуртал хьуну мукьах жун Тверской бульварданийн ТАСС-равун бачин багьлай бия. Тикку конкурсрал лауреатътуращалсса пресс-конференция дия. Тиккусса ихтилатру бия экономикалул тагьар сававну миллатирттал редакциярттал иш ялу-ялун лащинсса даражалийн багьлай бушиврия, кув «шанаши режимрайн» лавгун бушиврия, кувгу цифрардал дунияллийн буккансса бюхъу-хъит бакъа ливчIун бушиврия.
Пресс-конференциялия махъ жун Пушкиннул площадьрайсса «Известия Наll» тIисса концертру дай залданувун бия аьрххи. Ттул чIарав бацIан бувкIун бия Москавливсса «Дагъусттан» культуралул центрданул вице- президент БатIи Оьмаровагу, вава центрданул давривух мудангу чялишну гьуртту шайсса Басират Билаловагу. Вай Мариян Илиясовал цIанийсса «Дараччи» клубрал Москавлиймур филиалданул душругур, ттул хьхьичIунсса дусталгур. Аьрасатнал Президентнал виваллил политикалул управлениялул национал политикалул департаментрал хъунмур Татьяна Вагина бур сахIналия «журналистътал – творчествалул инсанталли, зул байрандалул, концертрал программагу личIиссара, мяъна куртIсса дикIай» тIий. Программа буниялттунгу личIиссара дия, конкурсрал тематикалуцIун даркьусса, лауреатътурал макьаларттавасса парчри артистътурал сахIналий ккаккан буллалисса.
ОьрчIансса ва жагьилтурансса номинация баян бувайхту, Басират ва БатIи ттул сурат рищун хIадур хъанай бия. Душру ца ххари хьуннихха ттун шамилчинмур кIану къабуллусса кIул шайхту. Аьдатрай цал шамилчинмур, яла кIилчинмур, хъирив цалчинмур кIану баян бувайва. Мува хIалатраву Анжелика Засядько ттучIан гъан хьуну, сахIналия ливхъун манарда, зула ххувшаврия неъмат ласияра, суратру рищуннин бацIияра тIий бия. Тти вагу ци тIун бивкIри тIий гьанавиххи шавайсса чIумал бавунни кIилчинмур кIанугу ттухьва бакъашиву. Ахиргу, баян бунни цалчинмур кIанттай «Илчи» бушиву. ТIайламур бусан, Дагъусттан, МахIачкъала, «Илчи»кказит тIисса цIарду та лахIзалувунияр нахIуну, нацIуну бавну бакъара. ТIутIал кацIгу, статуэткагу ттухьхьун дуллунни Аьрасатнавусса Беларусьнал национал-культуралул федерал автономиялул председатель, Аьрасатнал Президентнал Советрал член Сергей Кандыбовичлул ва Журналистътурал централ къатлул директор, академик Вячеслав Умановскийл. КIилчинмур кIану ва номинациялий бия Удмуртиянал телеканалданухь, шамилчинмур – «Ушкан» тIисса Улан Удэлив итабакьлакьисса оьрчIансса журналданухь. Гьай-гьай, ххаришиву дия хьхьичIунсса кIанттурду лавсъсса «Огонёк» журналданул корреспондентнащал, «Моя планета» каналданул ведущий ва пушественник Андрей Понкратовлущал, «Лента.ру», ТАСС-рал вакилтуращал ца ххуттайсса бахшиш ласун сахIналийн гьаз хьунсса тIайлабацIу шаврия.
Ца бахшиш ялагу ялугьлай ляркъунни ттухра Дагъусттаннал аэропортрай: Мариян Илиясовал цIанийсса «Дараччи» клубрал хъунмур Гульшан Хасаева бакIчину коллегахъул бувкIун бия тIутIащал на хьунабакьин. Вай гьантрай, социал сетирдай бикIу, укунма ттучIанма оьвкуну бикIу, чIявусса инсантурал барча бунна, ххуй-ххуйсса мукъурттих вичIи дишав. ДакIнийхтунусса барчаллагь бакIра-бакIрах гьарманан: зу на хъун буван зумух лавсъсса ягу чирчусса гьарцагу хIарп барачатну дацIаннав зуннагу. Барчаллагьри ляличIинува Москавуллал «Дагъусттан» культуралул центрданун, Лакрал театрданул коллективран, «Дараччи» клубран ва «Инт» кафелул хъунмур Саидат Кьурбанован (вагу анавар бувккуна «бавуравтIала» дуван).
Ттун, гьай-гьай, тIааьнну бур «Илчи» кказитрал цIа агьалинал зумув душивугу, цайми регионнайсса СМИ-дай, «Российская газета» кказитрай ва яла-яла «Национал акцент» порталданий чIяруну кIицI лаглай бушиврия. Ва порталданий дуссар медиафорумрал тIайланнасса трансляциягу, бахшишру дуллалисса церемониялул трансляциягу. Ттун кIулссия тIайланнасса трансляция тиккугу, Ютубрайгу дикIантIишиву, амма, хьхьичIунсса кIанттайн тамахI бакъахьувкун, я коллегахъахь, я ичIувацириннахь бургияра къаувкуссия. Уттигу къачIалссар ккаккан ччинан.