Жу ттинингу бувсъссия Лаккуй буллай бушиву кIива ляличIисса ламу. Вай гьантрай жу хьунабавкьуру ламурду буллалисса «Мостоотряд-99» АО-лул зузалтращал,
ихтилат барду ва даврий каялувшиву дуллалисса Аьбдулмажидов ХIамзалав Шуаьблул арснащал.
— Буси зула идаралия, виява, вила зузалтрая.
— «Мостоотряд-99» АО-лун гьашину хьуссар 25 шин. Щала Аьрасатнаву машгьурну дуссар лап жапасса журалул объектру баврийну. Жул пишакартурал канилух бувкссар шанма аэропорт: цIу бувссар МахIачкъалаллал аэропорт, Ростов шагьрулийсса аэропорт, кIира нюжмардул хьхьичI зий байбивхьуссар Ю. Гагариннул цIанийсса Саратоврайсса аэропорт.
![](http://ilchi.beget.tech/wp-content/uploads/2019/09/IMG_6567.jpg)
Региондалий ца яла хъуннасса инфраструктуралул проектран ккаллисса аэропорт буллай байбивхьуссар 2012 шинал ва къуртал бувссар ккаккан дурсса чIумуяр ччяни. Бувссар Москавлия Ярославрайн ва Вологдалийнсса автомобил ххуллу. Нава шикку зий хьунни 5 шин. Муниннин зий уссияв граждан объектру, гостиницарду, гидроэлектростанцияртту буллалисса идарарттай.
— Му ламу ккалли буллай бур «ляличIисса ламун». Ссавур дусса мунил ляличIишиву?
— Цалчинмур ламу (Гъази-Гъумучиял Хъуннеххайхсса) ккалли хъанахъиссар хъинну жапасса «инженер сооружениялун», ва лап захIматсса шартIирдай, ххяллу ялун дурургсса кIанттай бан багьлай бушиву хIисавравун лавсун. Цувгу хъанахъиссар щала Ухссавнил Ккавкказнаву яла лахъисса ва лахъсса ламу – 150 метралул лахъишиврийсса ва гьануцIа 129 метралул лахъшиврийсса, сайки 60 зивулийсса къатрал лахъшиврийсса.
КIилчинмур ламу (ШавкIуллал неххайхсса) буллалиссар 156 метра лахъишиврий, 65 метра лахъшиврий дусса.
— Цими зузала ур объектрай?
— Ламурду бавриву гьурттуну уссар 100 пишакар. Стройплощадкалий тIурча, зий ур 40 зузала ва 8 единица техникалул.
— Ци давуртту дан бювхъур зуща уттинин, цуксса даву дан дакIний буру шинал ахирданийннин?
— Декабрь зуруй жу байбивхьуру зузалт ялапар хъанансса база дузал буллай. Барду бетондалул завод. Ламу буллай байбивхьуру апрель зуруй. Агьамми давуртту къуртал хьунтIиссар шинал ахирданийннин. ТIабиаьтрал шартIругу даркьуну, арцул гужгу биялну бухьурча, 2020-ку шинал ахирданийннин кIивагу ламу бувну, тапшур бантIиссар.
— Барчаллагь хъунмасса. Кабакьиннав!
Ихтилат бувссар
Зулайхат Тахакьаевал