«Россети Северный Кавказ» ПАО-лул пишакартал зий байбивхьунни Ккуллал райондалул энергообъектру кIинтнил чIумуйннин хIадур буллай.
Гъумучиял РЭС-рал Ккуллал райондалул сетирдал участокрал зузалт зий бур лахъсса вольтрал линиярттал ххаллу даххана дуллай, трансформаторду цIу дуллай ва ремонт дуллай. СумбатIлив, Ккулув, Хъусрахь, ТIаннул ЦIувкIрав, Къюллул ЦIувкIрав ва ЦIущаннив баххана бан тIий бур 80 багьавайсса ттукIрал ттала.
Райондалул шяраваллаву аьмну баххана бан тIий бур 129 багьавайсса ттукIрал ттала.
Даххана дан тIий дур изоляторду, тIайла бан тIий бур бавкку-шавккусса ттукIрал тталлу, кIункIу дан тIий дур зурчIай тIисса ххаллу, кьукьин тIий бур ттукIрал ххаллу дусса кIанттурдайсса мурхьру.
Ккаккан дурсса пландалийн бувну, Ваччиял подстанциялий даххана дан тIий дур : 8 км. ттукIрал ххаллал, 129 ттукIрал тала, Ккулув ва Ваччав баххана бантIий бур 3 КТП (комплексная трансформаторная подстанция), бакьин бан тIий бур Ккуллал ва Ваччиял шяраваллавусса 2 КТП.
Гъумучиял РЭС-рал каялувчи Зураб ХIажиевлул бусаврийн бувну, чялишсса давуртту дуллай бур ЧIяв, Вихьлив, Ккулув. Вай шяраваллаву ларгсса кIинттул ялун лирчун дур гьавалул тагьардануцIун дархIусса диял дакъашивуртту.
Ванал кIицI лавгунни уттинин дурсса давурттайну райондалий ххуйсса даражалийн дуцин бювхъушиву ттукI биял баврил даву.
