Сентябрьданул 7-нний Москавлив Аьрасатнал президент Владимир Путин хьунаавкьунни Дагъусттаннал чIумуйнусса бакIчи Федор Щукиннущал.

Республикалул бакIчинал президентнахь бувсунни гьашину мартрал ахирданий – апрельданул байбихьулий тIабиаьтрал апатIирттал биян бувсса зараллу бухлаган баврил ва зараллу бивминнан кумаг баврил хIакъираву.
Ххал бивгьунни мукунма социал объектру баврил ва хасъсса дяъвилул операциялул гьурттучитуран ва миннал кулпатирттан кумаг баврил масъалартту.
Федор Щукиннул тIиму­нийну, личIинурасса тагьардал биян бувсса зараллу бухлаган баврил даву дуллай бусса бур цIакь дурсса пландалийн чул бивщуну.
«Зараллу бухлаган баврил цIу бутIуйсса давурттив лахъи ларгуна 30-45 гьатлий. Гьарзат кьакьан дурну, гьагъгу марцI бувну, дузал буварду инсантал бацIансса кIанттурду, цIу дуккан дуварду инфраструктура. КIилчинмур ятIапгу лахъи ларгуна сайки микссава гьантрай: зараллан бищарду кьимат, ччясса мутталий ччаннай дацIан дуварду лирну диркIмур», – кунни республикалул бакIчинал.
Ванал личIину бувсунни цивппа заллусса, документругу бакъасса къатрал заллухъруннан кумаг баврил хIакъираву.
«На вихь тавакъю бувссия му иширахсса къулагъас хъун дуван. Гьай-гьай, гьармур аьркинни цила чIумал дузал дуван, му бувчIлай бур. Инсантал мукунсса тагьарданухун багьну буния махъ мукунминнангу кумаг буван аьркинни», – увкунни президентнал.
«Жу вил тапшурлугъ каялувшиврийн ларсун зий буру. Шяраваллил хозяйствалул аьрщарайсса къатран хасну жун хъунмасса кумаг буллай бур жяматийсса сакиншиннардал ва меценатътурал. Аьмну хъанай дуссар сайки мукьра млрд къурушрал.
ХIасил, ми арцуя кумаг барду ва уттигу буллай буру къатрал документру цила чIумал дузал къабувну бивкIсса ялапарлувтуран. Вил тапшурлугъ махъ бакъа бартдигьинтIиссар», – увкунни Федор Щукиннул.
Владимир Путиннул цIув­ххунни социал- экономикалул бутIуцIунсса тагьарданиягу. Республикалул каялувчинал бусаврийну, Дагъусттаннай бартдигьлай бур цинярда федерал проектру ва региондалул лябуккулул программартту.
Жул щала командалул ца яла принцип ххимур масъалану хъанай буссар бюджетрал гьарца къуруш харж даву мюнпатрай ва цила чIумал, яни ацIрахъул шиннардий лахъи ларгсса стройкарду ххишала дикIан къааьркинссар», – увкунни Дагъусттаннал бакIчинал.
Агьамми давурттава Федор Щукиннул личIи бунни дуккаврилмур бутIагу. ОьрчIру чIявусса республикалий цIана бусса школардал гуж хъирив лаллай бакъар. Школардай кIилчинмур ва шамилчинмур сменарду дукьан дансса масъала бивхьуну буссар.