Ххувшаврил байран лахъа-хъунну кIицI ларгунни Читтурдал шяраву. Ва кьини шикку, шяраваллил дязаннив, тIиртIунни Буттал кIанттул цIанийсса Хъунмасса дяъвилул гьурттучитал – капитан Маммакьади Гъапуровлул ва Ризван Ибрагьимовлул, мукунна хасъсса аьралий операциялий чувшиврий жан дуллусса гвардиялул чIивима сержант Сагид Нурдуевлул цIарду абад дуллалисса мемориалданул ултти.
Мероприятиялий ихтилатру бунни Дагъусттаннал Халкьуннал Мажлисрал депутат Марат Илиясовлул, Лакрал райондалул бакIчи Зураб Куччаевлул, аьралий комиссар Аьли ГъазимахIаммадовлул, Сагидлул ссийл Тамарал, шяраваллил жяматрал вакилтурал.
Артиллериялул бригадалул взводрал командир Маммакьади Гъапуров увну ур 1920-ку шинал. 1939-1940-ку шиннардий гьуртту хьуну ур Финляндиянащалсса дяъвилий, 1941-1945-ку шиннардий Буттал кIанттул цIанийсса Хъунмасса дяъвилий. Ватан душманная дуручлай ккаккан дурсса чувшивурттахлу лайкь хьуну ур ЯтIул ЦIукул ордендалун, Буттал кIанттул цIанийсса Хъун дяъвилул 1-мур даражалул ордендалун, «За оборону Советского Заполярья», «За победу над Германией» медальлан.
Бюхттулсса наградартту лайкь дурну дур Ризван Ибрагьимовлулгу. ЯтIул ЦIукул орден дуллуну дур ванан тахсиркаршивурттащал, шпионажращал талай, къинттуллухсса районнай низам дуручлай ивкIун тIий. Хъуннасса агьамшиву дусса оператив бигарду щаллу бувну ва диверсионный группарду бат бувну тIий лайкь хьуну ур ЯтIул Ттугълил ордендалун. Ми дакъассагу, ванан дуллуну дур «За оборону Кавказа», «За боевые заслуги», «За победу над Германией» медальлу.
Гвардиялул чIивима сержант Сагид Нурдуев увну ур 1979-ку шинал. 2025-ку шинал лавгун ур хасъсса аьралий операциялийн. Къуллугъ буллай ивкIун ур Харьковрал областьрай. Вара шинал чувшиврий жан дуллуну дур Мирное поселокрачIа. Щаву дирсса аьралий дус цайна лавхъун нанисса Сагидлул мажал къавхьуну бур дронная вацIлувунай лихъансса. Ванан оьрмулул 45 шин диркIун дур. Сагид мудангу цаяванияр цайминная пикри буллалисса, дакI хъинсса, цаманан кумаг бан анаварсса хасиятрал инсан ивкIун ур. Ванан «За отвагу» медаль дулун ккаккан бувну бур.
Сагидлул аьпалун ванал ссурахъу Закаржа Учуевлул чивчуну бур вай ххару:
Оьрмулул чIявусса ххуллурду тIитIай,
Миннул тIайлашиву махъ жунма бувчIай.
Вил ххуллу, жул Сагид, кутIасса хьунни
Ккуллалул лавмартсса бяличIан бунни.
Хъирив кьини, майрал 10-нний, Читтурув цамургу бусравсса мероприятие хьунни. Марат Илиясовлул каялувшиннаралу 100-нния ливчусса шяраваллил инсантал лагма лавгун, шикку дунни субботник. МарцIшиву дунни шяраваллил майданнив, хIатталлий, зийлув, кIичIирттаву. Бувгьунни мурхьру.
Андриана Аьбдуллаева
