ЦIуссалакрал райондалий Ххувшаврил байрандалун хас дурсса мероприятиярттал лагрулий дайдирхьунни «Аьпалул багъ» тIисса, Украиннал аьрщарай нанисса хасъсса аьралий операциялий чувшиврий жанну дуллуминнал аьпалунсса акция.

Ванил лагрулий ЦIуссалакрал шяравун бухлахисса кIанттай ссуттихунмай бувгьусса «Аьпалул багъравусса» мурхьру цукун ххяхлай бурив, ягу цIусса бугьан багьлай бурив ххал бунни ЦIуссалакрал райондалул бакIчинал цалчинма хъиривчу Султан ХIамзаевлул, райондалул Мажлисрал депутат Артур Темировлул, райондалул администрациялул Шяраваллил хозяйствалул, экономикалул отделданул хъунама Камил МахIаммадовлул.
Райондалул администрациялул вакилтурал мукунна ххал дунни хасъсса аьралий операциялий Ватандалул ххуллий жанну дуллусса аьралитурал аьпа абад буллалисса гьайкал ва «Аьпалул багърал» лагма-ялттусса кIанттурду. Шикку цаппара мурхьру кьавкьун лявкъунни. Мунийн бувну, маслихIат бунни миннун кIанттай цIусса мурхьру бугьансса ва шикку ччя-ччяни субботникру, экологиялул акцияртту дуллансса.
Му бакъассагу, «Аьпалул багъраву» дишинтIиссар 2024-2025 шинал хасъсса аьралий операциялий жанну дуллусса аьралитурал цIарду чирчусса аьпалул ула.
Шиккува кIицI лаган, Аьрасатнаву «Аьпалул багъ» акция ряххилчинни хъанахъисса. Ватандалул Вирттавран хас дурсса шинал личIинура хъуннасса къулагъас дикIантIий дур ва акциялух.
Султан ХIамзаевлул кIицI лавгунни, цуксса хъуннасса дуссарив акциялул агьамшиву ва цуксса аьркинну дуссарив махъ ливчIминнан Ватандалул мурадру буруччаврил ххуллий жанну дуллуминнал аьпа буруччаву.
Акциялул лишанну хъанахъиссар Ватандалул мурадру буруччаврил ххуллий жанну дуллусса вирттаврал аьпалунсса щюлли гьайкаллу.
Имара Саидова