Уттигъанну МахIачкъалалив, Расул ХIамзатовлул цIанийсса Миллатрал библиотекалуву, хьунни Буттал кIанттул цIанийсса Хъунмасса дяъвилий гьуртту хьусса дагъусттанлувтуран хас бувсса чIявусса томру бусса луттирал презентация.
Шиккун бувкIун бия Аьрасатнал ПаччахIлугърал Думалул депутат, Аьрасатнал Виричу МахIаммад НурбахIандовлул ппу НурбахIанд, Дагъусттаннал Информациялул ва печатьрал агентствалул хъунама Арсен Юсупов, «Дагестан» этномедиахолдинграл» каялувчи Аьбдуразакь Жамалуттинов, «Дагестанская правда» кказитрал хъунмур редактор Бурлият Токболатова, шаэр, публицист, таржумачи Миясат Муслимова, издательствалул зузалт, творчествалул интеллигенция, журналистътал, политиктал, жяматийсса ишккаккулт. Дачин дурну ия мероприятие «Дагестан» издательствалул къатлул хъунама УмархIусман ХIажиев.
Ччянива бувккун бивкIсса «Отважные сыны гор» ва «Боевая слава Дагестана» луттирду утти цIуну итабавкьунни, цалсса чIирисса тиражрай. Цалчинсса экземплярду ккавксса Дагъусттаннал бакIчи Сергей Меликовлул луттирду хъуннасса тиражрай итабакьаву хъин чулий ккавккунни.
ДакIнин бутан, «Отважные сыны гор» тIисса луттираву цачIун бувну буссар журналистка Александра Путербротлул Совет Союзрал ва Аьрасатнал вирттавраясса очеркру. Цалчин ва лу итабавкьуну бивкIссар 1965-ку шинал Буттал кIанттул цIанийсса Хъунмасса дяъвилий Ххувшаву ларсун 20 шин шаврин хасну.
Шиву бувсун бур Дагъусттаннаясса саллатIнал ва хIаписартурал чувшиврия, ккаккан бувну бур архиврал материаллу гьануну ларсъсса, миннал дяъвилул ххуллурдаясса парчри, дакIнин бичавуртту, бардултрал бусласимур.
«Боевая слава Дагестана» цалчин бувкссар 1985-ку шинал, Ххувшаву ларсун 40 шин хьусса чIумал. Аьралий корреспондент ва ахттарчи хIисаврай, Александра Путербротлул дартIун дур дагъусттанлувтурал къучагъшивурттаясса ххаллилсса материаллу. Шиву авторнал бусласисса чIявуми дагъусттанлувтурая ва лу букканнин инсантуран къакIулну бивкIун бур. Луттирду цимилагу ялагу итабавкьуну бивкIун бур. Вай луттирду ккалли бан бучIиссар виртталсса дагъусттанлувтураясса энциклопедиялун. Вайннува ялун нанисса никиран кIул хъанай бур ттаттахъал чувшиврия.
Луттирду итабакьин бакIрайн лавсунни «Дагестан» тIисса издательствалул. Ванил хъунама УмархIусман ХIажиевлул кIицI лавгунни уттинин дурмунил хIасиллайн бувну буккантIишиву «Дагестанцы – защитники Отечества» тIисса 5 томрая хьусса энциклопедия.
Ва кьини хьунни му энциклопедиялувун буххантIисса кIива луттирал презентация. Проектрал лагрулий мукунма буккантIиссар Авгъан дяъвилий гьуртту хьусса, террорданущалсса талатавриву ларайсса наградартту лайкь дурсса, СВО-лий гьуртту хьусса дагъусттанлувтураясса луттирду.
Цала ихтилатраву УмархIусман ХIажиевлул бувсунни личIи-личIисса шиннардий цачIава итабавкьусса тарихрал, литературалул, Дагъусттаннал автортурал луттирду, аьмну 64 азарва лу, булунтIишиву КIулшиву дулаврил министерствалийн школардал библиотекардайх бачIин.
КIицI лавгунни, Федерал программалийн бувну, Библиотекарттал фонд авадан бансса арцу итадакьлай бушиву, Аьрасат хьхьичIва кунма луттирду ккалаккисса билаятрайн кIура баллай бушиву.
– АцIра шинал хьхьичI на гьуртту хьуссияв дунияллул даражалийсса хъуннасса мероприятиялий. Немецнал, Франциянал, Аьрасатнал халкьуннал луттирду буккаврил тагьарданул хIисав-сан дуллай, Аьрасат бия хъинну махъсса кьюкьлуву. ХIакьинусса статистикалийн бувну, дянивсса даражалул аьрасатлувнал шинай ацIва лу буккайсса бур. Му ххуйсса ккаккияр. ХьхьичIунсса билаятирттачIан гъансса, – увкунни ванал, луттирдал кьимат гьаз хъанахъавриясса ххаришиву кIидачIлай.
Андриана Аьбдуллаева
