Июньдалул 5-нний Донецкалий Жагьилтурал къатраву хьунни «Диалог на равных» тIисса, ялун нанисса ник патриот зумуну тарбия даву мурадрайсса мероприятие.
Ва хас дурну дия цала кьянкьашиврийну ва чувшиврийну бусалдаравун агьсса СВО-лул цалчинма Аьрасатнал Виричув НурмахIаммад ХIажимахIаммадовлун. Вара кьини Донецкалий НурмахIаммад ХIажимахIаммадовлул цIанийсса майданнивгу тIиртIунни Виричувнан хас дурсса мемориал объект. Шикку майданнивсса чIирайн лархъунни НурмахIаммадлул сурат. Ва дирхьуну дур Донецкаллал художница Вероника Нестеренкол.
«Здоровое Отечество» РО ООД-лул сипталийн бувну сакин дурсса мероприятиялий гьуртту хьун оьвкуну бия Виричувнал буттайн, полициялул полковник, Къучагъшиврул шанна ордендалул кавалер Энгельс ХIажимахIаммадовлуйн. Шикку мукунма гьуртту хьунни Донецкаллал БакIчинал ва ХIукуматрал администрациялул аппаратрал каялувчи Александр Гончаров, ДНР-данул Халкьуннал советрал председательнал хъиривчу Николай Сытов, Донецкалийсса «Здоровое Отечество» РО ООД-лул каялувчи Дмитрий Автономов, Донецкаллал Жагьилтурал парламент, корреспондент Вадим Топалов, аьралий училищардал курсантътал, кадетътал, спортментал ва цаймигу.
Мероприятие дайдирхьуна НурмахIаммад ХIажимахIаммадовлул чIавасса оьрмулий эбратранну ва яргну бивтсса аьралий ххуллун хас дурсса киносуратрая. Хроникалуву исват хъанай бия къучагъсса хасият Виричувнан ирсирай дирну душиву.
– Хъунама лейтенант ХIажимахIаммадов хасъсса аьралий операция биттур буллай ивкIун ур гьужум байсса десантрал бригадалуву. Гуж ххишаласса душмантурал лагма дургьуну, захIматсса щаву дирну унува, махъва-махъсса ккулла харж баннин талай ивкIун ур. ЦачIара лирчIсса гранаталух тIурча, цувагу, цува угьан ччисса душманталгу пIякь учин бувну бур.
Аьрасатнал тарихраву абадлий цIа кьариртсса Ватандалул Виричувсса арс НурмахIаммад ХIажимахIаммадов жуна тачIав хъамакъаитантIиссар, – увкуна Вадим Топаловлул.
Ихтилатру буллалиминнал кIицI лаглай бия Вирттаврал гьунардая цIанасса никирангу кIулну бикIан аьркиншиву.
Ахирданий Энгельс ХIажимахIаммадовлул барчаллагь увкуна арснал аьпа буруччаврил ххуллийсса давурттал сиптачиталну бувкминнахь ва аьпалул мажлисрай гьуртту хьун бувкIсса инсантурахь.
Имара Саидова
