МахIачкъалаллал администрациялул баян бунни, СВО-лул Аьрасатнал цалчинма Виричу НурмахIаммад ХIажимахIаммадовлун шагьрулий гьайкал дацIан дувантIишиву.
«Республикалул хъуншагьрулий НурмахIаммад ХIажи­махIаммадовлун мемориал дацIан дувантIиссар, муниха чялишну зий буссар. Мемориал цурдагу дацIан дувантIиссар МахIачкъала шагьрулул агьали чIявуну батIайсса кIанай – Октябрьданул 50 шин шаврил цIанийсса паркраву. ЦIанакул парк бакьин, цIу буккан буллалисса давуртту най дуссар, вай давурттал лагрулий мемориалгу дацIан дантIиссар.
Ва цIусса мемориал дацIан дантIиссар «Дагъусттаннай Совет власть дишин талай бивкIминнал» гьайкалданул чIарав, вагу региондалул культуралул ирс-ххазиналул статус дусса объектри. НурмахIаммад ХIажимахIаммадовлунсса мемориалгу паркрал тарихийсса ансамбльданул бутIун хIисав дувантIиссар», – тIий бур мэриялул баян баврий.
Жу Виричунал ниттичIан Сапижат МазаевачIан оьвкуссия, мемориал та тIитIинтIий бурив ва мунил автор цу уссарив мяйжан бувансса пикрилий. Сапижат Исяевнал бувсунни цалсса уттигу мяълум бувансса кIантту бушиву, мунияту балжийсса информация булун къахьунтIишиву. Бувсунни цаппара иширттал хIакъираву бази шайхту, баян бувантIишиву.
Умудрай буру жугу, билаятралгу, дунияллулгу хьхьичI Дагъусттаннал Вирттаврал чувшиврул цIа гьаз дурну, абадшиврувун лавгсса НурмахIаммадлул гьунарданун ва цIанин лайкьсса мемориал дацIан дувантIишиврий.
Шиккува дакIнин бутанну, 2023 шинал, Экономикалул министерствалул сквердануву Аьрасатнал цама Виричу МахIаммад НурбахIандовлун гьайкал тIитIлатIисса митинграй, тани Дагъусттаннал бакIчину зий ивкIсса Сергей Меликовлул кIицI лавгун бивкIшиву НурмахIаммад ХIажимахIаммадовлунгу чара бакъа гьайкал дацIан дуван аьркиншиву.
«Жунма дакIний бур жула хIаписарнан, десантникнан цукун лахъсса кьимат бивщуссарив Аьрасатнал президент, Верховный главнокомандующий Владимир Путиннул. МахIачкъалаллал администрациялул гьайкал дацIан дувансса къулайсса участок личIи дуван аьркинссар, гьайкал цурдагу гьарца чулуха лайкьсса, хIакьину Ватандалул мурадру буручлачисса циняв Вирттаврал гьунарду ккаккан буллалисса даражалийсса дикIан аьркинссар», – увкунни республикалул каялувчинал.
ПатIимат Рамазанова