Ссапарбаг Аьбдуллаев:
«Буттал кIанттул цIанийсса Хъунмасса дяъвилий гьуртту хьусса жула шяравасса хъунмур никирал чиваркIуннащал гьан дурми чIунну яла хъамакъаритайми ва дакIния къалагайми дур».
Жуйва гьарцаннайсса буржну хъанай бур, дяъвилул цIараву жанну дуллуми ва зана хьун кьисмат хьуми бакIра-бакIрах дакIнийнгу бивчуну, гайннал дурсса виричушиврун багьай­сса кьиматгу бивщуну, жула оьрчIал оьрчIругу гайннал бувмунил хIурмат буну, эбратрай тарбия баву. Мукунна эбрат ласлан дур, жула лакрал щархъаву Хъун дяъвилул гьурттучитурал аьпалун гьайкаллугу дацIан дуллай, барчаллагьрал ххуллийсса аьпагу буручлай, цащава шаймургу, ца ххишалагу буллалиминная. Мукунминнавасса цагу ур жуна чIявучин кIулсса ва бусравсса, лакрал миллатрайн багьайсса гьарца ишираву чялишсса гьурттушинна дайсса, ДР-лул Жяматийсса палаталул председательнал хъиривчу, меценат, Аьлил арс Ссапарбаг Аьбдуллаев. Къимизу-зунттулу дирхьу­сса ванал буттал шярава Вираттату Буттал кIанттул цIанийсса дяъвилийн лавгун ур 21 инсан, махъунай зана къавхьуну ур 8. Вайннал аьпалун Вираттиял шяраву гьайкал дацIан дурну дур 1996 шинал. Гьайкал дурну дур МахIачкъалалив ва му дацIан дан Вираттиял шяравун мухлукь бавтIун бивкIун бур. Дурну хъуннасса батIавугу, аьпалул хьумигу дакIнийн бивчуну, ттигу-шилагу гьайкалданух ургъил-аякьа дуллай бур. КIицI данну зана къавхьуминнал цIардугу: Аьбдуллаев МахIаммад, Аьбдуллаев Шарабуттин, Аьбдуллаев Жяъппар, МахIаммадов Амир, МахIаммадов Мажид, ХIажиев Гъапур, ХIажиев Камал ва Ссунгъуров НикIу.
Дяъвилия зана хьумигу шяраву ва райондалий цала бусса оьрмулий личIи-личIисса пишардай зий-занай бивкIун бур. Ссапарбаг Аьлиевичлул, гьарца Ххувшаврил байрандалул хьунийн ветерантал-шяравачутал барчагу бувну, цала чулухасса бахшишру дайсса диркIун дур. ХIарачат байсса бивкIун бур байрандалул гьантрай ми ца ссупралух цачIун бавтIун, цаннащал ца яхши-хаш бан ва аьпалул хьуми дустал дакIнийн бичинсса шартIру дузал дан.
Вана ва суратрайгу ца мукунсса батIаврий цачIу бавцIуну бур Хъун дяъвилул ххуллурду бивтсса Вираттиял шяравасса Оьмаров Илияс, Исяев Къарат, Кьурбанов АьбдурахIман, Шахшаев МахIаммад-Расул ва Марщаев ХIамзат.
Ххувшаву ларсун 80 шинал юбилейран хасну, Вира­ттиял шяравату Хъун дяъвилий гьуртту хьуми дакIнийнгу бичлай, вай суратирттал тарихраягу буслай, Ссапарбаг Аьлиевич кIицI лаглай ур га никирал кьянкьасса ва дугъри­сса чиваркIуннащал гьан дурсса чIунну яла хъамакъаритайми душиву.

Залму АьбдурахIманова