Ларайсса пишакаршиврул ва интеллигентшиврул, марцIшиврул ва тIайлашиврул, инсаншиврул ва рахIму-цIими бушиврул эбратну цила цIа Дагъусттаннал медициналул тарихраву кьариртсса хIакин-гинеколог, цIа дурксса аьлимчу, медициналул элмурдал доктор, профессор Набинал душ Зайдиева (Магьдиева) Загьидатлун август зурул 9-нний 100 шин хьунтIиссия.

ЧIявучин ва Зоя Набиевна тIий кIулссия. Чансса бухьунссар хьхьичIмур никирал хъанниву ванил кумаг аьркин къабагьсса. Цикссагу хъами буккан бувссар ванил захIматсса тагьарданува, ххассал бувссар цимивагу цIуну дунияллийн уклакисса чIивитIул оьрму.

Оьрмулул шинну ларгун махъгума, хьхьу-кьини къаувкуну, сант дуну-дакъа, оьвчайхту, га цIана бучIайссия цила кумаг аьркин багьлагьиначIан. Оьрмулухун ванийн барчаллагьрайсса инсантал чIявусса лякъинтIиссар жула халкьуннаву. Ттун ттунма дакIнийри, ца бугьарасса хъамитайпа гъан хьуну, барчаллагьрай, ганил канийн ппайрду тIий, Зоя Набиевна га паракьат буллай бивкIсса куц. ОьрчI буллалисса ганил душ захIматсса тагьарданувун багьну, мугьлат бакъа Зоя Набиевна бучIан бувну, ххассал бан бювхъуну бия.

Бувну бур Загьидат 1926-ку шинал август зурул 9-нний Ккурккуллал шяраву. Набинал ва Майминатлул арулва оьрчIаву ва хъунма-хъунмур бивкIун бур. Ккурккуллал дянивмур даражалул школагу лавайсса даражалий къуртал бувну, бувххун бур дуклан Дагъусттаннал медициналул институтравун. Институт къуртал бувну махъ ца шинай Кумиял шяраву, участокрал хIакиннугу бивкIун, гихунмайсса щала оьрму Дагъусттаннал медициналул институтрацIун бавхIуну бия. 1986-1992-ку шиннардий ва каялувшиву дуллай буссия лечебный факультетрал акушерствалул ва гинекологиялул кафедралий. 1970- ку шинал Москавлив Загьидатлул лавайсса даражалий дурурччуссар медициналул элмурдал докторнал диссертация. Ванил цIа студентътурай дакI цIуцIисса, миннаха аякьалийсса преподаватель хIисаврай кIулну дикIайссия. Ца ппурттуву экзамендалийн къаувкIсса студентнал бувсун бур цала ппу аьпалухьхьун лавгун учIан къавхьушиву. ЦIухху-бусу бувну, Зоя Набиевнан кIул хьуну бур хъунмасса кулпатравасса студентнал ичIаллил тагьардания. Циламур экзамендалунгу кьимат бивхьуну, студентнал зачеткалущал гайми преподавательтурачIангу гъан хьуну, студентнан кьимат бишин тавакъю бувну бур, га стипендиялуцIа къахьун. Къаххирану бикIанссарив укунсса преподаватель студентътуран. Ванил хIурмат ляличIинува хъунмасса бия миннал дянивгу, даврил уртакьтурачIагу. «Буттан лайкьсса душ бур», – тIун бикIайва ккурккул, ванил ппу Набигу инсаннан кумаг бан, чIарав ацIан чялишсса ивкIун тIий.
ОьрчI бан нанисса, захI­матсса патологиялущалсса хъа­ми циняв ванил аякьалулу бикIайссия. ХIакьсса хIакиннал кунма къашайшалал буруккин циламур кунма кьамул байва. ЗахIматсса тагьарданувусса хъамитайпа ккавккукун га хъювсул буккайва. Му къулай хьуннин чIарав бикIайва, цила аякьалула буккан къабитайва. ОьрчI бан бувкIсса хъаннин цинявннан щалагу республикалийх цIа дурксса Зоя НабиевначIан багьан ччай бикIайва.
Бакъая га къуллугърах ва цIардах мюхтажминная, хъус-хъиншивурттайн иман дирхьуминная, модалул хъирив багьминная, ххира янналуву чIюлу хъанан ччиминная. Къаккаркссар ттун тачIав ванил ссурссулух мусил утта щинзиргу, каний мусил, бирлиянтрал кIисригу, хIатта ми лаххансса даражалий бунугу. ХIасил, бакъая ва ттизаманнул инсан. Ва бия оьрмулул мяъна-мурад цила пишалуву чIалачIисса, хъамитайпалул цIуллу-сагъшиврул масъала хьхьичI ххуттай бивхьусса цила бикIайкунсса хIакин. Кафедралул хъунмурну битлатисса чIумал, хъунмасса хIал хьуну бур ва рязи къахъанай, му къуллугъ ччисса цайминнан ххуллу лакьин ччай бакъара тIий. Институтрал ХIурматрал улттуйн лахъан сурат дулун рязи къавхьуну, сурат дишайсса хахливу хъунисса хIарпирдай ванил инициаллу чирчуну диркIун дур. Дагъусттаннал акушерствалул ва гинекологиял тарихраву ванил чирчуссар лайкьсса лажин. Зоя Набиевна бур чIярусса элмийсса публикациярдал автор. Пишалул ххуллий бивхьусса захIматрахлу ва ххаллилсса ккаккиярттахлу Зоя Набиевна лайкь хьуну бур «СССР-данул ЦIуллу-сагъшиву дуруччаврил отличник», «Дагъусттаннал лайкь хьусса элмийсса ишккакку» тIисса бусравсса цIардан. Ва бия Буттал кIанттул цIанийсса Хъунмасса дяъвилул ва захIматрал ветеран. Вайннуяргу бюхттулсса цIардан лайкьссия Зоя Набиевна, цуппа хьхьичIун ххяхлан ччисса бакъая.
Загьидатлул душ Янсиятгу ниттил ххуллийх лавгун бур. Вагу лавайсса даражалул хIакинни, медициналул элмурдал докторди, профессорди. ЧIярусса шиннардий зий буссия Москавуллал областьрал Акушерствалул ва гинекологиялул научно-исследовательский институтраву хьхьичIунсса элмийсса зузалану.
Андриана Аьбдуллаева