Мартрал 30-нний Дагъусттаннай дайдирхьунни «Вахта героев Отечества» тIисса щалагу Аьрасатнал патриот акция. Акциялул лагрулий Дагъусттаннал БакIчи Сергей Меликовлул ва проектрал гьурттучитурал, Буттал кIанттул цIанийсса Хъун дяъвилий жанну дуллумигу дакIнийн бивчуну, аьраличунал гьайкалдануцI тIутIив дирхьунни. Аьралуннал савлугърал музейраву хъамаллуран ккаккан дунни Аьрасатнал къучагъсса тарихрая, билаятрал тарихраву цIа кьариртсса дагъусттанлувтурая бусласисса экспозицияртту.
Буттал кIанттул цIанийсса Хъунмасса дяъвилий къучагъшиву ккаккан дурсса вирттаврая буслай, музейрал директор Джаннет Сагитовал дакIнийн бивчунни дагъусттанлувталгу – КIийла Совет Союзрал Виричу АхIмад-Хан Султан, Освенциум дуснакьравуми тархъан бавриву гьуртту хьусса генерал-полковник МахIаммад Танкаев, цалчин Рейхстаграй Ххувшаврил ттугъ бивщуминнавух ивкIсса Аьрасатнал Виричу Аьбдулхаким Исмяилов.
Мукунна хъамаллураща ххал дан бювхъунни Аьрасатнал Вирттавран хас дурсса стенд.
ДакIнийн бутан, Аьрасатнал Виричунал цIанин лайкь хьуссар 38 дагъусттанчу.
Вара кьини Дагъусттаннал БакIчи Сергей Меликов хьунаавкьунни «Вахта Героев Отечества» проектраву гьуртту хъанахъисса Аьрасатнал Вирттавращал. Вайннавух бия «Аьрасатнал Вирттаврал Ассоциация» тIисса щалагу Аьрасатнал жяматийсса организациялул президент, Аьрасатнал Виричу Владимир Шаманов, Дагъусттаннал Мюхчаншиврул Советрал секретарь, Аьрасатнал Вирттаврал Ассоциациялул Дагъусттаннал отделениялул каялувчи, Аьрасатнал Виричу МахIаммад Баачилов, «Аьрасатнал Вирттаврал Ассоциация» организациялул члентал, республикалул министерстварттал ва ведомстварттал каялувчитал.
Сергей Меликовлул кIицI лавгунни хьунабакьаврий гьуртту хьун бувкIсса чIявуми Дагъусттаннай аьрали къуллугърал бурж лахълай бивкIсса бушиву.
– Жула республикалий ялапар хъанай бур личIи-личIисса миллатирттал ва диндалул инсантал. Жува циняв цачIун буллай буру ВирттаврачIансса хIурматрал, цашиврувур жула гужгу, цIакьгу бусса, – увкунни Республикалул БакIчинал.
Сергей Меликовлул лайкьшивурттугу кIицI дурну, Владимир Шамановлул дуллунни ванан «Отвага. Честь. Слава» тIисса Аьрасатнал Вирттаврал Ассоциациялул медаль. МахIаммад Баачиловлул бувсунни Ассоциациялул тарихрая ва мурадирттая.
