Майрал 13-нний ГьунчIукьатIрал шяраваллил дянивмур даражалул школалий хьунни ПатIимат Штанчаевал «Оьрмулул лахIзарду» тIисса луттирал презентация. Ванил сиптачину бия ГьунчIукьатIрал школалий 50-ллихъайсса шиннардий учительну зий бивкIсса, Дагъусттан Республикалул лайкь хьусса учитель Дандамаева Асият МахIаммадханнул душ. Сакиншиндаралсса бувну бия школалул учительтурал коллективрал, Мариян Илиясовал цIанийсса хъаннил «Дараччи» клубрал ГьунчIукьатIувсса филиалданул.

ХIадуршиндарал диялсса хъар цайнна ларсун дия школалул директорнал хъиривмур Фатима Ххинчаловал ва библиотекалул хъунмур Жамиля Юсуповал, вайннацIун кабавкьуну бия школалул махъсса цинявппа учительтуралгу.
Шадлугъ дачин дурну бия школалул лакку мазрал учитель Сияна Къушиева.
ГьунчIукьатIрал школалул директор, ПатIиматлущал ца классраву дуклай ивкIсса Малик Къушиевлул цалва ихтилатраву кIицI лавгуна ва школалий дуклакисса чIумалва гьарца чулуха итххявхсса душ бивкIшиву.
ПатIиматлул ссурахъу Гулизар Ххинчаловал, дакIний­хтунусса ихтилатгу бувну, цила чулуха ххаллилсса тIутIал кацI буллуна. Жамиля Юсуповал дурккуна ПатIиматлул цIуну бувксса луттиравасса назмурду.
Шяраваллил администрациялул бакIчи МухIад Штанчаевлул бувна ПатIиматлухь бусрав-барчаллагьрайсса ихтилат, чил билаятрай ялапар хъанай бунугу, ниттил мазрайсса назмурдал лу чивчуну тIий. Ихтилатгу бувну, ПатIиматлул цIусса луттиравасса назмугу дурккуна шяраваллил ккурандалул хъунаманал хъиривма Кьур­­банаьли Ибрагьимовлул.
Асият Дандамаевал, хъинну ххуйсса махъгу лавхъун, дурккуна цилла ПатIиматлуха чирчусса назму.
Ихтилат бувна Мариян Илиясовал цIанийсса хъаннил «Дара­ччи» клубрал ГьунчIукьатIувсса филиалданул хъунмур Сарижат Къушиевалгу.
Фатима Ххинчаловал пишкаш бувна цилла каруннил був­сса, ПатIиматлул суратращалсса хъунмасса торт.
Ва кьини ПатIиматлул цIагу, ванил цIуну дунияллийн бувксса цалчинсса лугу кIицI лаглагисса ихтилатру чIявусса цаймигу хьуна.
Презентациялийн хIадур дурну дия ххаллилсса музыкалул программагу.
Хьунабакьаву хьуна дакI­нийхтунусса, шикку бивкIминнан дакIний личIансса, гъилисса, ваца хъунмасса бавкьусса кулпат цачIун бавтIний куннасса.
Презентациялия махъ ПатIимат тIий бур:
– Ттула буттал шяраву, ттунма ххирасса школалий ттулва луттирал презентация дурсса кьини на ттулва оьрмулул ца яла ххарими кьинирдавун дутавияв. Цал уттигу хъунмасса барчаллагь ва давривух гьур­тту хьусса цинявннанмагу. Зул каши-кьудрат бюхттул хьуннав. Ттунмарив чIа учин ччива ттунна ххирасса шяраваллин ва миллатран мюнпатранну зун-занансса оьрму…
ЦIуну бувксса луттиравусса назмурдая цIувххукуннив, ПатIимат бур вай цинярдагу цинна цакуцну ххирар, гьарцагу назмулул цилва-цилва тарих буссар тIий. Эшкьи-ччаврилми назмурдал бутIарив хасну щинчIав хас бувсса бакъар, вай бур лирический герой хьхьичI ацIан увну чивчусса ххару. Луттираву вай шеърирдал бутIагу буллуну бур «Кьаландалул чивчусса ххару» тIисса мукъурттилу.
ПатIимат бувну бур Гьун­чIукьатIрал шяраву 1958-ку шинал ТIагьирдул ва ЛатIипатлул кулпатраву. 1975-ку шинал къуртал бувну бур школа, хъирив – Каспийскаллал медициналул училище. Зий бивкIун бур шяраву ФАП-рай акушеркану. 1982-ку шиная шийнмай ва ялапар хъанай бур Бакуй. Зий бур цилла дакIнил лавсъсса пишалий (гинекологну). ЧIярусса шиннардий Азирбижаннаву ялапар хъанай бунугу, ва тачIаввагу архну бакъар гъан-маччаминная, шяраваллил инсантурая, дустурая, Дагъусттаннай бикIу, буттал шяраву бикIу хъанахъимуния. Ванил цилва тIийкун, ва бур гъинттул – Лаккуй, кIинттул – Бакуй, дугьарасса нинугу дурцуну.
ПатIиматлул ур кIия арс, ца душ. Ца арс хасъсса аьралий операция байбивхьуния махъ ванивух гьуртту хъанай ур.
ПатIимат Штанчаевал «Оьр­мулул лахIзарду» тIисса лу­ттирал презентация хьу­ссар МахIачкъалаливгу, Расул ХIам­за­товлул цIанийсса Национал библиотекалий, чIявусса инсанталгу бавтIун.
Барча тIий ПатIиматлухь цал­чинсса лу итабакьаву, чIа тIий буру вания тийнмайгу цIу-цIусса луттирду чичлансса гъира-гьавас, оьрмулуцIунсса ххари-шадшивуртту.

Бадрижамал Аьлиева