Уттигъанну МахIачкъалалив, «Атлас Холл» тIисса ресторандаралуву, пишалул уртакьтурал ва мачча-гъанминнал вив лавсун, оьрмулул 70 шинал юбилей кIицI ларгунни Цалчинмур ЦIувкIратусса Дагъусттаннал лайкь хьусса хIакин, медициналул элмурдал кандидат Расуллул душ Минкаилова Сарижатлул (Санерал) .
Ва 1981 шиная шинмай зий буссар цилва къуртал бувсса Дагъусттаннал медициналул университетраву, стоматологиялул факультетрай, хирургиялул стоматологиялул ва лажиндарал хирургиялул кафедралул доцентну. ВаничIа ккалай бивкIсса студентътурал личIи-личIисса конкурсирттай хьхьичIунсса кIанттурду бугьайсса бур, ххуйсса хьхьичIуннайшивуртту ккаккан дайсса дур. Ванил студентътал хIакьину Аьрасатнал чIявусса регионнай цивппа зузисса кIанттурдай хьхьичIунминнавух бур. Амма барча буллалисса чIявуминнал кIицI лавгсса куццуй, ва бур хьхьичIун бурувгсса.
Санера барча буллай, стоматологиялул факультетрал декан ТIагьир Абакаровлул кIицI лавгунни стоматологиялул элмугу, кIулшивурттугу дюхъан даврил ххуллий цIакьсса хъар ларсун наниминнавух Санера Минкаиловал цIагу душиву.
«Медициналувугу, кIулшиву дулавривугу чIярусса шиннардий ина бивхьусса захIматран багьа бищун къахьунссар. Преподавательнал даврий бивхьусса захIматрахлу ва чIалачIи дурсса ккаккиярттахлу цимилагу лайкь хьуну бура хьхьичIунсса наградарттан. Ина бусравну бура жул коллективраву, эбратрану бура студентътуран, хIурматрай бура медициналуву зузиминнал дянив. Давриву дакI дирхьусса, куртIсса кIулшивуртту дусса, ина кунмасса педагогначIан студентътал багьаву – студентътуран цанмагу, нитти-буттангу тIайлабацIулунсса ишри. Жул бавкьусса коллективрангу ххуйсса инсан тIайлабацIур», – увкунни ванал. Барча буллалицири ва кьини, ца зумату кунма, кIицI лаглай бия Санера Расуловна цаманал щавулий ка дишин анаварссар, рахIму-цIими бусса, гьарца чулуха шавхьсса, архIал зузиминнангу, студентътурангу личIинува ххирасса инсан бушиву.
Цилва оьрмулул ххуллия ца-кIива зат буси учайхту, Санера институтралмур оьрмулия буслай бур.
«Махъсса шиннардий университетрал ректор, профессор Висампаша Ханаьлиевлул каялувшиндарайну факультетрай хъинчулийннайсса дахханашивуртту хьунни, стоматологиялул кафедрарду цIусса смарт-телевизордал ва уттизаманнул фантомирттал дузал бунни, студентътуран материал ккаккан дуллай, лахьхьин булланшиврул. Цаппара гьануми кафедрарду М. Макьсудовлул цIанийсса Республикалул стоматологиялул поликлиникалийн цIусса кабинетирттавун бизан бувссар, преподавательтуран ва студентътуран къулайсса шартIругу хIасул дурну. Студентътал-стоматологтал щалагу Аьрасатнал ва дунияллул халкьуннал дянивсса олимпиадарттай гьуртту хъанай , хьхьичIунсса кIантту бугьлай бур, Дагъусттаннал бакIчинал ва ХIажи Мах1ачевлул Фондрал стипендияртту ласлай бур. Волонтертал хIисаврайгу зий бур. Нава бувтсса оьрмулул ххуллул хIисав ласлай, яла хъунмур ххаришиву дикIай, ттула душнил кулпатраясса ххаришивруя ливчун мукьах, ттулва студентътурая ларайсса квалификация дусса, даву кIулсса хIакинтал бушиврия. Зунмагу чIалай бур, ккарччал хIакиннал даву технологиялийн чул бивщуну ца яла хьхьичIуннай нанимур, мудан кIулшивурттал хъирив багьну, цIушиннарду лахьлан аьркинмур пиша бушиву. Ттула студентътурая мукун ххуйсса стоматологтал хьусса, минная барчаллагьрай цIарду дуллалисса хаварду баллалавур – даврил ва захIматрал хIасиллу къаоьккисса душиву. Ми цивппа хьунабавкьутаригу дуниял ттунна дуллуссаксса ххари шара », – тIий бур Санера Расуловна.
Нагу ххи банна, дакI тIиртIусса, шяраваллил агьулданущалгу, гьарманащалгу хIал бавкьусса, инсаннал хIурмат бан кIулсса Санера Расуловна ЦIувкIуллал жяматрангу ххирашиву. Ва жяматрал чIарав бикIайссар мудангу бивкIулий, буккулий, хъатIуй, кьюртIилий. ЦIувкIуллал шяраву бур учинсса ца хъамитайпар.
«Ниттирссу Санера жул тухумрал ттарцIри, мяйжаннугу ттарцI кунма гьарнал чIарав бацIайссар. ЯхI-къирият дусса, хъамал ххирасса, инсаннал дакIниймур бувчIайсса, циняр ххуйми хасиятру циву дусса хъамитайпар », – тIий ур ванил ссийл арс, лакрал агьалинан ххуйну кIулсса, хIукуматрал лавайсса къуллугъирттай зий ивкIсса Роберт Аьлиев.
«Чувнал багьасса хъамитайпа хIазран къаучайссар жу ванийн», – бахIлай бур архIал дуклай бивкIмигу.
Нагу барча буллай бура ттула ххаллилсса шяраву душ, чIаххув душ Санера Расуловна. ЧIа тIий бура цIакьсса цIуллушиву, гьарица ишираву тIайлабацIу. Ниттил цIа дирзсса душнил ПатIимал ва ххаллилсса куявнал, Дагъусттаннал халкьуннал артист Рашид Багатаевлул, вайннал наслулул ххари булланнав гихунмайгу, оьрмурду тIутIайх бичиннав. Вайннаягу, вила оьрмулиягу рязинува, дакI ххаринува битаннав.
ПатIимат Рамазанова
