Гъумучиял Культуралул центрданул ва библиотекалул коллективрал сакин дурну ГьунчIукьатIув хьунни «Навруз-байрам» – Интнил хьхьу. Ва хьунни «Творчествалул десант» проектрал лагрулий.
Интнил хьхьунил байран хьуна ГьунчIукьатIрал шяраваллил Культуралул къатрал хьхьичIсса майданнив. Ваний гьуртту хьуна райондалул культуралул идарарттал ва библиотекарттал зузалт, лагма щархъаясса инсантал.
Шадлугъ дачин дурну ия Гъумучиял Культуралул центрданул художествалул каялувчи АьлихIажи Щамхалов. Ванал, мажлис байбихьлай, бавтIми барча бувна байрандалущал, чIа увкуна цIуллу-сагъшиву, ххаришивуртту, буллугъшиву, някIсса ссавнил лувсса паракьатсса оьрму. Хъирив вара мяъна-мурадрайсса, бувкIминнахь ча бувкру тIисса, ххари-хъиншивуртту чIа тIутIисса ихтилат бувна ГьунчIукьатIрал шяраваллил администрациялул бакIчи МухIад Штанчаевлул.
Гихунмай хъаннил балайлул «Вайлар», «ХъункIултIутIив» группардал, арамтурал балайлул «Вирттал» группалул, ГьунчIукьатIрал дянивмур даражалул школалул дуклаки оьрчIал ккаккан дуруна концертрал программа. Дуклаки оьрчIру ва байрандалийн хIадур бувну, вайннан лакку саннарду, халкьуннал балайрду, назмурду лахьхьин дурну дия ГьунчIукьатIрал шяраваллил библиотекалул хъунмур Жамиля Юсуповал.
Байрандалийн, культуралул идарарттал ва библиотекарттал зузалтрал хIарачат бувну, дурну дия лакку дукрарду: хьхьахьхьари, бартри, аьрайн-гьавккури, натIухI, ккунукрал ххункIру, дукьрахIан, мучари, хъурунхъусса, нагьлий ини, бакъухъ ва цаймигу.
Бадрижамал Аьлиева
