Аьрасатнал чIявусса шагьрурдай кунма, Медициналул зузалтрал кьини Тверь шагьрулийгу барча бунни хьхьичIунну зузими. Губернатор Игорь Руденнул кIицI лавгунни, инсаннал цIуллушивугу, оьрмугу буручлачисса пиша дунияллийцири пишардаву ца яла бусрав-барчаллагьран лайкьмур бушиву, цивппа зузисса кIанттурдай медициналул зузалал бурж лажин кIялану батбигьлагьисса чансса бакъашиву. Дуллунни наградартту медициналул ветерантурангу, жагьилминнангу.
«За верность профессии и компании» тIисса номинациялий ххув хьусса медсестра Кусаева Аминатлунгу диплом буллунни. Ва Цалчинмур ЦIувкIратусса Шяъбаннул ва Сонял душри. Буттал шяраву школа къуртал бувайхту, Тверьдайсса медициналул колледжравун дуклан бувххун бур, акушеркал касму лахьхьин. Къуртал байхту, тиккува Тверьдайсса азарханалий медсестрану зун бивкIун бур. ЗахIмат ххирасса, даврил мухIлу-хIин ххуйну кIулсса Аминат коллективравугу хIурматрай бур.
«Так хIакинтурал кумаграйну къашайшалт хъин буван къашай, ялунгума хIакиннаяр лахъину къашайшалал чIарав бикIай медсестра, ххалаххив буллай, аьркинсса процедурартту буллай. Жуйрасса жаваблувшинна кIулну, вихшала цIакь дувансса хIарачатрай зий буру жугу. Инсан, хъингу хьуну, азарханалия ххарину шавай лагаврия жугу ххари шару. ХIакинтал, азарханалул хъуними, даврия рязину, Медициналул зузалал кьини чIири-хъунсса бахшишрайну жу ххари банмуних бикIай. Гьай-гьай, жухрасса къулагъасгу тIааьнну дикIай», – тIий бур Аминат.
Барча буллай буру жугу, чIа тIий буру цIу-цIусса ххари-хъиншивуртту ва тIайлабацIу!
ПатIимат Рамазанова
