Ларгсса хамискьини Лакрал райондалийн даврил аьрххилий бувкIун бия ДР-лул туризмалул ва халкьуннал сянатирттал министрнал хъиривмур Анна Безрукова ва республикалул хьхьичIунсса туроператортал.

Ва аьрххилул гьанумур мурад бия турист маршрутравун бутан лайкьсса кIанттурдугу ккаккан бувну, инфраструктура туристътал кьамул бансса тагьарданий ду-дакъашиву ххал дансса.
Райондалул бакIчи Зураб Куччаевлущал вайннал ххал бунни агьамшиву дусса турист объектру ва хъамал ликкай къатри.
 Хьунабакьаврий ххал бивгьунни туризмалул инфраструктура хьхьичIуннай даврийн ва туризмалул кумаграйну экономика гьаз даврийн багьайсса суаллу.

Анна Безруковал кIицI лавгунни райондалул авадансса магьирлугърал ирс ва туристътал кIункIу бан бюхъайсса мунил потенциал.
Райондалул бакIчинал вихшала дишин бунни администрация хIадурну бушиврийн туризм хьхьичIуннай даврил ххуллийсса сиптардацIун гьарца чулуха кабакьу буллан. Аьрххилул хIасиллайн бувну, дурунни ччясса мутталий дансса давурттал план. 
Аьрххилул лагрулий ккаккан дурунни райондалул магьирлугърал зузалтрал хIадур дурсса хъатIул аьдат. Делегациялун мероприятие ххуй дирзунни.

Анна Безруковал кIицI лавгунни райондалучIа душиву туризмалул индустрия хьхьичIуннай даншиврун ­аьркинсса гьарцагу луртан.
ДакI дарцIуну бура ­увкунни, проектру кIанттул ­властирдал кабакьулийну цила ххуттай щурущи дулларча, район хьун бюхъайшиву республикалий ца яла машгьурсса туризмалул кIанттуну.

Зулайхат Тахакьаева