Ларгсса нюжмардий Гъумук хьунни «Ттул Ватан – Аьрасатри» тIисса магьирлугърал фестивальданул зунттал районнал дянивсса этап. Цувгу сакин дурну дур ДР-лул Культуралул министерствалул Халкьуннал творчествалул къатлущал цачIуну ва районнал муниципал сакиншиннардал кабакьаврийну.

Мероприятие хьунни терроризмалул идеологиялийн къаршисса паччахIлугърал программалул лагрулий. Гьашинусса ­фестиваль хас дурну дия Аьрасатнал Халкьуннал цашиврул шинан. Фестивальданул гьанумур мурад — Аьрасатнал халкьуннал культуралул аьдатирттайхчил чIяву миллатру бусса билаятрал цашиву цIакь давур. Ванил щалла программа хас дурну дия Буттал кIанттул цIанийсса Хъун дяъвилул ва хасъсса аьралий операциялул темалун.

Фестивальданул гьурттучитурахь ча бувкру чин цалчин сахIналийн увккунни хасъсса аьралий операциялия игьалаган увкIсса Исякь СалихIов, Гъумучиял магьирлугърал къатлул музыкантри цувагу. Залданувуцириннал, лавай бивзун, хъатру ришлай, хIурматрай хьунаавкьунни ­аьралийчу, ччясса мутталий аьралий иширттал ахиргу дуркIун, шавай зана хьуну лякъиннав тIисса дуаьрдугу хъиривну.
Муния махъ Лакрал райондалул бакIчинал хъиривмур Эльмира МахIаммадовал кIицI ­лавгунни, жуяра ятсса идеология жагьилтурай ялув духIлахIисса чIумал вайннал дакIру культуралул ххассал дувантIишиву.

Фестивальданий гьуртту хьунни Лакрал, Ккуллал, Лаващиял, Ахъушиял, Гъуниннал, Щаржавуллал, Гумбетуллал, ЧIарадиял, Бущихъиял, Аьхьхьахъиял, ЦIумадиял ва Шамиллул районнаясса фольклор ансамбльлу, халкьуннал театрду, балайчитал, къавтIалт ва дуклаки оьрчIру.
Сакиншинначитурал кIицI лавгунни миллатирттал дянив дакьаву ва цашиву цIакь даврил ххуллий магьирлугъ куннал куннан ккаккан даврил агьамшиву.
Фестивальданий гьуртту хьусса гьарца коллективран буллунни Культуралул министерствалул чулухасса дипломру ва Лакрал райондалул администрациялул чулухасса бахшишру.

Зулайхат Тахакьаева