Хъуннасса сийлий кIицI ларгунни щалагу билаятрай Аьрасатнал ПаччахIлугърал Ттугълил кьини.
Гьарза-гьартану кIицI ларгунни му кьини Дагъусттаннайгу.
Дагъусттаннал Жагьилтурал иширттал министерстволул сакиншиндарайну тамансса мероприятияртту хьунни республикалул шагьрурдай ва районнай.
Ватан дуруччултрал командалул телефоннаву итабавкьуну бия Ттугълил кьинилун хас бувсса тIуркIу «Ттугъ гьаз буллай».
Дагъусттаннал шагьрурдай ва районнай хьунни «Триколор» акция. Ванил лагрулий волонтертурал хъуншагьрулул агьалинайх ва хъамаллурайх бавчIунни триколор-лентарду, Аьрасатнал ПаччахIлугърал ттугълил тарихрая бусласисса буклетру. Му бакъассагу, кIичIирттаву хьунабавкьусса агьалинахь цIухлай бия Аьрасатнал тарихрая.
***
Республикалул районнай Аьрасатнал Гимнрахун тIитIин бунни ПаччахIлугърал ттугъ. Табасараннал райондалий 300-нния ливчусса инсантал гьуртту хьунни байрандалул кьинилун хас дурсса багьттагьалтрал походрай.
***
«Мы – граждане России!» тIисса Щалагу Аьрасатнал программалул лагрулий 14 шинну бартларгсса оьрчIал лавсунни цала бакIрал чагъарду.
***
«Оазис» тIисса МахIачкъалаллал пляжрай хьунни Аьрасатнал Ттугълил кьинилун хас бувсса флешмоб.
Акция байбивхьуна пляжрай субботник даврия.
Волонтёртурал ччюрклицIа марцI дунни хьхьирил зума, хъирив бунни Аьрасатнал ттугъ тIитIин буллалисса флешмоб. Ахирданий акциялий гьуртту хъанахъиминнал ттугъругу кIутIу буллай, барча бунни аьрасатлувтал Ттугълил кьинилущал.
***
МахIачкъала шагьрулул администрациялул оьвкуну бия хасъсса аьралий операциялий гьуртту хъанахъиминнал оьрчIайн вай гьантрай Пушкиннул кIичIираву нанисса «Вершина вкуса» тIисса дукралул фестивальданийн.
ОьрчIан хIадур дурну дия бялахъансса программа.
Шагьрулул магьирлугърал школардайн заназисса оьрчIал увкунни патриот зумунусса балайрду.
Зузикьини къуртал шайхту оьрчIащал хьунаакьин фестивальданийн увкIуна МахIачкъала шагьрулул бакIчи Юсуп Умавов.
Байран барча куну, ванал бувсуна хIакьину жула ватанлувтал паччахIлугърал мурадру буручлай, агьамсса бурж биттур буллай бушиву. КIицI лавгуна жула хъунмасса билаятрай дусшиврий ялапаргу хъанай, даим хIадурну бушиву захIматсса тагьардануву цума-цаннал чIарав бацIан.
ОьрчIан чIа увкуна талихIсса оьрму, дуккавриву ва иширттаву тIайлабацIу.
***
МахIачкъала шагьрулул контрактрай аьралуннаву къуллугъ бан наними батIайсса пунктрай хьунни акция «Военная служба по контракту в ВС РФ — Твой выбор!». Укунмасса акцияртту хьунни Каспийскалий ва Дарбантливгу.
Инструктортурал контрактрай къуллугъ буллан гьан ччиминнахь бувсунни тIалавшиннардая, социал хIаллихшиннардая ва гарантиярдая.
Контрактрай къуллугъ бан гьан ччиминнаща бучIан бюхъайссар ва адресрай: ш. МахIачкъала, НурмахIаммад ХIажимахIаммадовлул цIанийсса кIичIиравалу, 1-мур къатта, 4-мур квартира.
ЦIухху-бусу бан оьвчин бюхъайссар ва номерданий:
8 (989) 484-69-95.
Зулайхат Тахакьаева
