Августрал 10-нний Р. ХIамзатовлул цIанийсса Миллатрал библиотекалуву лахъа-хъунну хьунни «Ттиркьюкьал чарсса» тIисса Ххадижат ЦIаххаевал луттирал презентация.
Андриана Аьбдуллаева
ЧчянияцIава чичлачисса цила шеърирду цачIун бувну ва жуж итабавкьунни Ххадижатлул нанисса шинал мартрай. Ва авторнал хьхьичIва-хьхьичIсса лу бунугу, ва дунияллийн букканнинма кIулну бия Ххадижатлул шеърирду чIявуминнан соцсетирдайхчин. Ванил мукъурттий тIий бия балайрду.
Ххадижатлул луттирал презентациялий гьуртту хьун, ванил кьини хъун дан бувкIун бия лу итабакьин каялувшиву дурсса Дагъусттаннал халкьуннал чичу, филологиялул элмурдал доктор, профессор Хизри Ильясов, Дагъусттаннал халкьуннал шаэр, «ЧIавалачин» журналданул редактор Мирза Давыдов, М. Илиясовал цIанийсса «Дараччи» фондрал президент Гульшан Хасаева (вай бия президиумравугу), «Ябувара жулва миллат» тIисса патриот ккурандалул ва чIярусса шиннардий Ххадижат зий бивкIсса МахIачкъалаллал 6-мур поликлиникалул вакилтал, ЦIуссалакрал райондалул Культуралул управлениялул зузалт, шаэрнал гъан-маччами.
- Ххадижатлун хас бувну укунсса шеъри чивчуну бур Исрапилбаг Мудуновлул:
- Аьрасатнал хъун шагьру,
- чIивисса лакрал миллат,
- ЦачIун батIайсса ххуллу
- чанна бувайсса чирахъ.
- Гьарца хьусса иширан
- шеърирду ляхъан байсса,
- Цинявннангу бусравсса,
- жул ххаллилсса Ххадижат.
- Жула лакрал ккурангу
- ина чIюлу дурунни,
- Вила тIааьн чIунийну,
- бусравсса мукъурттийну.
- Ххирасса жул Ххадижат,
- вин тIайлабацIу баннав,
- ЧIяву-чIявусса жужру
- дунъяллийн буккан буллан.
- ЦIуллушиву дулуннав,
- вил кьудрат ххи дуваннав,
- Бюхттулсса лакрал миллат
- ххари буллай личIаннав.
Поэзиялул мажлис тIигу тIивтIуну, гихунмай лавайсса даражалий бачин бувну бия библиотекалул отделданул хъунмур Сарат Аьбдуллаевна.
Ххадижат цалчинсса лу буккаврищал барча буллалисса ихтилатру бувна президиумравуминнал бакъассагу, лу дунияллийн буккан кумаг бувсса авторнал одноклассник, хIакин-пульмонолог Камалуттин Кьурбановлул, «Илчи» кказитрал отделданул редактор Андриана Аьбдуллаевал, «Ябанну жулва миллат» ккурандалул хъунмур Валида Исякьовал ва м.ц.
– Ххадижатлул шеърирду бачIин бучIир шанма бутIуйх: граждан лирика, тIабиаьтрал лирика ва эшкьи-ччаврил лирика. Дур луттираву хас бавурттал разделгу. Ванил шеърирду ккалаккиний чIалай бур Ххадижат цилва миллатгу, Дагъусттан ва Лакку кIанугу ххирасса инсан бушиву. Ца шаэрнал увкуну бур: «Миллатрал ххазина – мазри, мазрал ххазина – шаэрди», – куну. Ххадижатлул бур щаращул щин кунма марцIсса, пасихIсса маз, – кIицI лавгунни цала ихтилатраву Хизри Ильясовлул. Ихтилатирттал лях-карах ЦIуминалийсса ЦIуссаккуллал ва Чапаево шяраваллил школардаясса дуклаки оьрчIал бувккунни Ххадижатлул шеърирду. Ванил мукъурттийсса балайрду увкунни Марленал, Муъминат Юсуповал, Ххадижатлул ссил Иринал. Вайннал балайрдахун ца авурну къавтIун бивзунни шаэр Сажид Камиловлул арснал душ, мяйра шинавусса Ххадижат.
Ахирданий ихтилат бунни цила Ххадижатлул. Ванил дакIнийхтунусса барчаллагь увкунни цинявппагу лу итабакьин цинма кумаг бувминнахь, чIарав бавцIуминнахь, цила кьини хъун дан бувкIминнахь.
ЛяличIинура кIицI ларгунни лу дунияллийн буккан кумаг бувсса Камалуттин Амирбековичлул, презентациялул хъунмур хъар лархъсса Сарат Аьбдуллаевнал, цинявппагу шиккун бувкIсса хъамаллурайн дуссухун оьвкусса «Инт» этно-кафелул заллу Саида Дундаровнал цIарду.
