ЦIуминалийсса ЦIуссалакрал щархъавусса школардайн жу мудангу гъирарай бачару. Гьарица лавгтари, школардайсса кIулшивуртту дулаврил давугу, ларайсса низамгу, шикку дуллалисса личIи-личIисса мероприятиярттугу ккарккун, тIааьнсса асардащал зана шару. ЦIуссалакрал оьрчIал гьарица шинах хьхьичIунсса кIанттурду бугьай республикалий хъанахъисса конкурсирттай ва олимпиадарттай.
А. Аьбдуллаева
Ва ххуллухгу цIуну тIивтIусса Гьамиящиял школалий хьунни «Щаращив» тIисса шеърирду буккаврил конкурс. Конкурсрай оьрчIал пасихIну буккин аьркинну бия лакку мазрайсса шеърирду. Ва конкурс гьашину кIилчинни хъанахъисса. Ванил сиптачитал хьунни Апанни Къапиевлул цIанийсса Лакрал театр ва ЦIуссалакрал КIулшивуртту дулаврил управление. Шикку гьуртту хьун бувкIун бия ЦIуссалакрал райондалийсса ва ЦIуминалийсса школардал цинявппагу классирттал оьрчIру ва ми хIадур бувсса лакку мазрал учительтал.
Конкурс дайдишин хьхьичI Гьамиящиял школалул дуклаки оьрчIал залдануву щябивкIминнайх бавчIунни цала бувсса, георгиевская лентардугу бавхIусса, дакьаврил хьхьиру. Конкурс байбивхьунни лакрал гимнрайну. БувчIунни жюри. Миннавух бия: Дагъусттаннал халкьуннал артистка Уди Аьлиева, Аь. Тахо-Годил цIанийсса Педагогикалул институтрал элмийсса зузалт Фиразат Магьдиева ва Светлана Мутаева, ЦIуссалакрал райондалул КIулшивуртту дулаврил управлениялул хъунаманал хъиривчу Светлана Къудаева.
Конкурс дайдихьлай, ихтилат бунни Светлана Къудаевал. Ванил бувсунни шеърирду буклакиминнаясса тIалавшиннардая. Шеърирду пасихIну буккаву бакъассагу, хIисавравун ласлай бия шеърилул тема, артистшиврул гьунар ва оьрчIал чIалачIин.
ХьхьичI шеърирду бувккуна мюрщими классирттал оьрчIал, хъирив – хъуниминнал.
ОьрчIал хIадур бувну бия лакрал шаэртурал язими шеърирду, ккалай бия цаннаяр ца пасихIну. Жюрилунгу бигьану бакъая кьимат бищун, хьхьичIунма язи угьан. ХьхьичIунминнавух ия ниттил мазран хас дурсса цинярдагу мероприятиярттай чялишну гьуртту шайсса ЦIуссаккуллал 1-мур школалул дуклаки оьрчI Султанов Батирхан.
Цинявппа хIайран бунни ва конкурсрай хъуними оьрчIал дянив цалчинсса кIантту бувгьусса Гьамиящиял школалул дуклаки оьрчI Тамазаев Сурхай-Ханнул. Аьраличунал янналуву ванал бувккусса дяъвилун хас бувсса шеъри хъинну асар хьуна жюрилунгу, тамашачитурангу. Шеърирду бувккуну махъ Гьамиящиял школалул дуклаки оьрчIал ккаккан дунни концерт.
Ххув хьуминнан дипломругу буллуну, оьрчIан мюнпатсса маслихIатру буллалисса ихтилат бувна Уди Аьлиевал.
Фиразат Магьдиевал барчаллагь увкуна ва конкурс тIайла дуккансса шартIру дузал дурсса школалул директор ПатIимат Султановнахь ва ванил коллективрахь, мукунма оьрчIащал зий бивкIсса учительтурахь.
ьунгу.
