ЦIусса дуккаврил шинаву Тахакьа АхIмадовлул цIанийсса Хъусращиял дянивмур даражалул школалийн лавгунни арулцIалаксса дуклаки оьрчI. Вайннава ххюннан рирщунни Цалчинсса занг. АцIния цалчинмур классравун увкIунни кIия. 

КIулшивурттал кьинилун  хас дурсса шадлугърайн бавтIун бия учительтал, дуклаки оьрчIру, нину-ппу, хъамал.
Линейка дайдирхьуна па­ччахI­лугърал гимнрахун ттугъ гьаз баврия.
Школалул директор Щайх­ахIма АхIмадовлул ­ларгсса ду­ккаврил шин, ЕГЭ-лул хIасиллайн бувну, тIайлабацIусса диркIшивугу бувсун, чIа увкуна дуклаки оьрчIан хьхьичIуннайшивурттайн хъит тIунсса гьавас. 

Райондалул администрациялул чулуха цIусса дуккаврил шин барча дан увкIун ия Аьбдуллагь Валиев. 
Дуклаки оьрчIал  ватандалухасса назмурду дурккуну махъ рирщунни Цалчинсса занг.