[dropcap]Л[/dropcap]аргсса нюжмаркьини Апанни Къапиевлул цIанийсса Лакрал драмалул ва музыкалул театрдануву хьунни хъуннасса байран, Дагъусттаннал халкьуннал артистка Ларина Оьмаровал оьрмулун 75 ва творчествалун 45 шин там шаврил кIира хъуннасса юбилейран хас дурсса.
Актрисал оьрмулия ва творчествалул ххуллия бувсуна ДР-лул халкьуннал артист, Лакрал театрданул хъунама режиссер Аслан МахIаммадовлул.
Зулайхат Тахакьаева
ДР-лул культуралул министр Зарема Буттаевал цIания Ларина Оьмарова барча буллай, театрданул каялувчи Бадрижат МахIаммадхIажиевал увкуна:
— ХIурмат бусса Ларина МахIмудовнай, ина хъанахъиссара ттизаманнул театрал магьирлугърал яла цIадуркми ишккаккултравасса ца. Вил пишакаршиву тIалавну дур хIакьинугу, 45 шинал мутталий вил актершиврул гьунар ялун ливчуссарличIи-личIисса жанрардаву. Вил канилух дурккун дур 70-лунниха лирчусса тикрал къашайсса, личIи-личIисса заманардал, оьрмурдал ва жанрардал сипатру. Амма хъиннува яргну вил гьунар аьч хьуну бур хъярчийсса роллаву. ХIакьинугу 
агьамсса кIану бугьлай бура ина театрданул репертуардануву.
Ларина Оьмарова барча бан бувкIун бия Дагъусттаннал культуралул зузалтрал профсоюзрал хъунмур, политикалул элмурдал доктор Марзижат Буттаева, ЦIуссалакрал райондалул бакIчинал хъиривчу ХIажи ХIажиев ва Культуралул управлениялул каялувчи ХIабибат Буттаева, Лакрал райондалул культуралулуправлениялул каялувчинал хъиривчу Марина Хизриева.
Гъази Гъазиевлул цIания бусравсса артистка барча бан увкIун ия «Оптика-Телеком» ООО-лул директор Сапижулла Аьлиев. Барча баву тIайла дурккун дия ДР-лул Жяматийсса палаталул хъунаманал хъиривчу Ссапар Аьбдуллаевлулгу.
Муния махъ ккаккан бувна лакрал шаэр Бадави Рамазанов дунияллийн увккун 100 шин там шаврил юбилейран хас бувну бивхьусса «Хъявринсса ччаву» спектакль. Миву Ларина Оьмаровал лап усттарну дургьунни чIявукIулсса ва лавмартсса Маймакил роль.
