Лакрал райондалул бакIчи Юсуп МахIаммадов «Дагсвязьинвест» компаниялул вакил ХIажикьурбан Алхулаевлущал ялтту увккунни цIуну дуллалисса детсадрал къатрал. 120 оьрчIансса ттизаманнул тIалавшиннардацIун даркьусса ххаллилсса къатри Гъумук дацIан дурунни кутIасса чIумул мутталий «Демография» тIисса Аьрасатнал миллатрал проектрал лагрулий.
Шикку бур гьарта-гьарзасса, чаннасса музыкальный ва спортивный заллу, пищеблок, санузел.
Халкьуннал кашилуцIух 1950-ку шиннардийра дурсса, дух хьусса, шартIру дакъасса къатрава мюрщулт чIал къавхьуну бизан тIий бур ттизаманнул шартIирдал лащу-щаллусса аьнтIикIасса къатравун.
– ТIааьнсса асардай ливчIунна цIусса детсадрал къатри ххал дурну махъ. Шикку хIасул дурну дур оьрчIал творчествалул ва спортрал бюхъурду итххяххан бансса шартIру. Гьарца зузалангу дур къулайсса шартIру. Детсадрал хIаятраву бур беседкарду ва бялахълансса кIанттурду. Июнь зуруй жура шадлугърай тIитIинтIиссар ва детсадрал нузру, – увкуна Юсуп МахIаммадовлул.
