Апрель зуруй тIабиаьтрал апатIрайну бивсса зараллу бухлаган бувну, инсантал цайнма цивппа бучIаннин, цIунилгу зунттал районнай гъараллайну баларду ялун бивунни. 

ЛахIунтту, валтру кьатI куну, ххуттава дурккунни энергосистема, бавщунни ххуллурду.

Ва тагьарданул ялув Лакрал райондалул бакIчи Зураб Куччаевлул дунни чярхнийсса иширттал ялув зузисса комиссиялул батIаву.
Комиссиялул батIаврий гьуртту хьунни райондалул прокурорнал буржру биттур буллалисса Хизри НурбахIандов, райондалул бакIчинал хъиривчутал ва жаваблувсса идарарттал каялувчитал.
Райондалул бакIчинал комиссиялул члентурая тIалав бунни тIабиаьтрал апатIрал биян бувсса зараллу бухлаган бансса чаранну бюхъайссаксса анаварну лякъин.

ГьунчIукьатIрал ва Гъумучиял дянивсса ххуллул участокрай лахIунтту дагьну дур, хъуннасса нигьачIаву дур гихуннайгу дагьаврия.
Укуннасса тагьар хIасул хьуну дур Гъумуча Гъунив нанисса ххуллийгу. Гьан-бучIан къахъанай ливчIун бур КIамахъаллал, Ппалассуннал, Уриннал ва Мукьардал шяраваллал агьали. 

Ххутрал ва Увурдал шяраваллавун нанисса ххуллий кьатI куну бур ххяллул чартту, дагьну дур лахIунтту. Чартту кьатI куну, лакьин багьну бур Инишиял, Къуруллал, Лахъирдал, Вираттиял, БахIикIуллал шяраваллавунсса ххуллурдугу. Шахьуйннал шяравун нанисса ххуллул шанбачIулий машинартту лагайсса кIанттайн валт дагьну дур.

Зараллу хьусса кIанттайн бувкIун бур «Дагавтодорданул» зузалт. Зий бур ххуллул зузалт ва техника.
Зураб Куччаевлул кIицI лавгунни тIабиаьтрал апатIрайну хьусса зараллу бухлаган баврил ялувсса давуртту цала къулагъасралу душиву.

Зулайхат Тахакьаева