Гужсса гъараллу лачIаврийну Лакрал райондалийгу зараллу хьуну бия, ттукIрал ххаллу рурцун, тталлу багьну, ххуллурдайн лахIунтту дагьну. Лавкьуну бия Хьурив, Лахъирив нанисса ххуллурду.

Гьавалул тагьарданух къабурувгун, райондалул энергетиктал ва ххуллул зузалт хьхьу-кьини дакъа зий бия агьалинан бюхъайсса ччяни чани булун, ххуллурду марцI бан.
Чани буллуну бур КIувурдал, Ххутрал, Буршиял, Ххюлуссуннал шяраваллавун ттукIрал ххаллу нанисса фидердай.
ЗахIматсса тагьар дур НицIавкIуллал ва ДучIиннал шяраваллаву – багьну бур ттукIрал тталлу.

Уттинин марцI бувну бур ЧIарттал ва КIувурдал ххуллурду. БахIикIуллал шяравунсса ххуллу марцI бан аьркин дагьну дур кIусса техника.
Силул мугьалттал лахIунтту ларсун, захIматсса тагьарданий ливчIсса Ури-Мукьардал махIлалийнсса ххуллул ялтту уккан нанисса Лакрал райондалул бакIчи Зураб Куччаев цува ливчIун ия машина кьувтIун.
«Ттун ччай бия ва ххуллу ци даражалий бурив ххал бан. Мяйжаннугу, захIматсса тагьарданий бур. Ччясса мутталий цин лавхьхьусса кIанттайн буцинну», – тIий ур райондалул бакIчи.
ЦIанасса чIумал шикку зий дур техника.

Зулайхат Тахакьаева