Гьарза-гьартасса ва яргсса репертуар хIадур дурну дия Лакрал театрданул ЦIусса шинан хас дурну.

ТIайлабацIу буну хьунни Болгарнал режиссер Богдан Петканиннул бивхьусса палангнал драматург Ф.Вебердул пьесалиясса «Нядуку» тIисса спектакльданул премьера. Цивугу гьурттуну бия театрданул жагьилсса актертал. Пьеса лакку мазрайн бувцуну бур Руслан Башаевлул.
Ххаллилсса даражалий хьунни театрданул цинявппа балайчитал гьурттусса аьдатсса ЦIушинал концерт.
Ва концертрай Дагъусттаннал халкьуннал артист ХIажиаьли ХIажиаьлиевлун дуллунни Мариян Илиясовал цIанийсса «Дараччи» фондрал чулухасса премия «ЯхI ва къирият». Премия дуллунни фондрал хъунмур Гульшан Хасаевал ва Марияннул арснал арс Амирдул. ДакIнийн бутанну, «ЯхI ва къирият» тIисса премия дулун ккаккан дурну дур «Дараччи» фонд­рал ва Илиясовхъал кулпатрал чулуха лакку маз ва миллатрал культура ядаврил ва хьхьичIуннай даврил цIаний дакI марцIну захIмат буллалаврихлу. Цалчин ва премия дуллуссар ларгсса шиналсса ЦIусса шинал концертрай Дагъусттаннал халкьуннал артистка Луиза Шахдилован.
Чялишсса гьурттушинна дурунни театрданул артистурал «ЦIусса шинал десант» акциялувугу. ЦIуссашинал каникуллал гьантрай яржа бивхьуну занай бия Дя­къилттатта, Марххаладуш ва магьравасса персонажтал ХIамзатовлул кIичIиравух, Лениннул майданнийн елкалучIан бияннин, шагьрулул агьали барча буллай, миннайн театрдануву бигьалагай гьантрай хьунтIисса мероприятиярттайнгу оьвтIий.
Бигьалагай гьантрай ялагу сакин бувну бия гьарца шиналсса рахIму-цIимилул акция, ятин­сса ва мушакъатсса оьрчIан уква ккаккан бунни А.Усачевлул пьесалиясса спектакль «Айболит». Р. Аскерхановлул цIанийсса медицинский колледжрал волонтертурал оьрчIан дуллунни «Вella-M» ттучандалул чулухасса бахшишру.