Вай гьантрай «Дагестан» РИА-лий хьунни «Маяки дружбы. Башни Кавказа — 2025» тIисса волонтертурал проектран хас дурсса пресс-конференция.

Ванил спикерталну бия Дагъусттаннал волонтертурал проектрал каялувчи Хасбат Пилакаева ва ДР-лул миллатирттал политикалул министерствалул вакил Заур Уруджев. Вайннал тIимунийну, сентябрьданул 13-нния 21-ннийнин Аьра­сатнал волонтертал гьуртту хьунтIий бур тарихрал объектру цIу бу­ккан баврил давурттавух. Проектрал площадка хьунтIиссар жагьилтал хIала-гьурттуну зузи кIануну: цачIу зугу-зий, бигьагу лаглантIиссар. Микку дуссар кIулшиврул (познавательные) программарттугу. Миннуйну гьурттучитураща бюхъантIиссар куртIну кIул хьун Ккавкказуллал республикарттаясса жагьилтурал культуралущал, традициярттащал ва аьдатирттащал. Даву дуллантIиссар ларайсса кIулшиву дусса пишакартурал ва инструктортурал каялувшиврий.
Проектрал хъунмур мурад хъанахъиссар:
– миллатирттал дянивсса хIала-гьурттушиву: Аьрасатнал миллатирттал, АьФ-лул субъектирдал дянивсса дусшиврийсса дахIавуртту цIакь шаву;
– архитектуралул ирс ябаву: Ккавкказуллал тарихрал ва культуралул ирсирал агьамшиву дусса объектру – дяъвилул, къаралданул ва сигналлал чIюйрду ва къаларду ябаву.
– жяматран кIулну бикIан аьркиншиву Аьрасатнал тарихрал ва культуралул ирс ябаврил масъаларттал хIакъираву;
– туризм лядуккан даву: чIюйрдал комплексру ва къаларду агьамсса туристшиврул объектру хIисаврай, миннущал туристътал кIул баву, региондалул тамашалунсса кIанттурдащал кунма. Аьрасатнал кьиблалул национал республикарттал туристшиврул потенциалдануцIун кабакьаву ва лябуккан баву.
Экспедициялуву ур 45 инсан (миннавух бур цIусса регионнал ялапарлувтал ва СВО-лул гьурттучитал). Проект бартдигьлай бур 2016 шиная шиннай (Да­гъусттаннай – 2017 ш.) АьФ-лул Миллатирттал иширттал агентствалул кабакьаврийну «Реализация государственной национальной политики» тIисса АьФ-лул паччахIлугърал программалул лагрулий.

ХI.Аьдилов