«СВО-лул Виричу» тIисса награда

Хасъсса аьралий операциялул гьурттучи, ЦIуссалакрал шяравасса Мурад Юсупов лайкь хьунни «СВО-лул Виричу» тIисса наградалун.
Хасъсса аьралий операциялийн Мурад лавгун ур контракт чирчуну. Мунияр шихунай оьрмулун нигьачIисса шартIирдай лайкьну бартбигьлай ур аьралийчунал бурж. Аьралий ишру нанисса кIанттурдай ванал цимилагу ккаккан дурну дур чувшиву. Хасъсса аьралий операция нанисса кIанттурдай билаятрал мурадру буручлай бавцIуминнал цуксса агьамсса ва жаваблувсса хъар лахълай буссарив бувчIлай, хIарачат буллай ивкIун ур цала бурж лажин кIялану бартбигьин.
Дяъвилул иширттаву ккаккан дурсса чувшиврухлу ванан «СВО-лул Виричу» тIисса хIурматлувсса цIа дуллунни. Му дулунсса хIукму бунни «Салют Победы» тIисса Дунияллул халкьуннал дянивсса Дакьаврил Парадрал наградной комитетрал.