Правозащитник, къуллугъ кьабивтсса МВД-лул майор Ума Аскерханова вай гьантрай цIунилгу лавгунни СВО-лийн гуманитар кумагращал. Ва уттисса аьрххи Аскерхановал 45-чинссар хасъсса аьралий операция нанисса кIанттайнсса.
СВО байбишайхту, уртакьтуращал «Солидарность и Свобода» тIисса жяматийсса ккурангу хIасул дурну, вай гуманитар кумаг батIлай хъуннасса даву дуллай бия. Хаснува МахIачкъалалив Сепараторный посёлокрай, сайки цинявннан хавар бусса Хуршиловлул кIичIиравусса 9-мур къатлуву яхъанахъисса патриотътуращал. Вайннаву лак чансса бакъар. Чялишну хIала бувххун бия ва давривух ЦIуминалийсса лакгу. Хаснува Дагъусттаннал элмийсса центрданий зузисса ПатIимат Базманова, Чувшиврул ордендалун лайкь хьусса Полина Халилова, балайчи Садаят МахIаммадова ва цаймигу душру.
Жул журналистъталгу шамийла-мукьийла хьунабавкьуссар ванищал цищалвагу, ванил уртакьтуращалгу. Ума Аскерханова мудан барчаллагьрай бикIай гуманитар кумаг батIин кумаг буллалиминнайн. ЗахIматрал фронтрайминнал кумаг аьрай чара бакъа аьркиннугу, бусравнугу бунутIий.
Пахрулий кунма, бусрав-барчаллагьрай кIицI лаганна ванищал СВО-лийн кумаг биян буван лагаймигу чIярумур чIумал лаккуоьрчIру бушиву. Вай цукунчIав рязи къашай цаятува бусан, чичин. Ва ялагу, кумаг бувайминнаву, фронтрая цичIар ххира къадуван хIадурминнавугу тамансса лак бушивугу. ХхувшавричIансса ххуллу гъан буллалисса давриву бутIа бишаву, мин-тин бакъа, кьиматрайсса давур.
«Буниялттунгу, мудан кумаг буллалиминнаву чIявусса лак бур, лях-карах кумагращал бучIайминнавугу мукунма. ПатIима, Сарбижамал, Наташа, Мисиду, Магдалина, Ххадижат ва цаймигу лакку-душру. Цинявннул цIарду кIицI лаган къахьунссар, дакIнингу къадагьанссар. Жул аьмсса мурадгу жулва чиваркIуннан шайкунсса кумаг бавур. Ва даврил цачIун бувну, лаккудушваврал ххуйсса ккуран дуссар, дусшивугу цIакьссар. Ума Аскерхановагу мудан вас-ццахлий тIайла буккару, цIуллуну-сагъну шаппай зана хьуния тIий. Ванингу, циняв душваврангу цIуллушиву чIа тIий бура, дуниял паракьат хьуннав, ххувшавугу ларсун, жулва виртталгу ччяни шаппа-шаппай зана хьуннав!» – тIий бур ПатIимат Базманова.
ПатIимат Рамазанова
