Аьрасатнаву гьарца шинал августрал цалчинмур алхIаткьини кIицI лагайссар Муххал ххуллул зузалал кьинину. Му кьини сунбатIуллалгу байрандалун ккаллиссар.

СунбатIуллал арамтал лагайсса бивкIссар хъус лякъин хIалтIилухун, муххал ххуллуцIун дархIусса давурттай зун. Яла махъсса шиннардий хIалтIилухун лагаву кIура дарну дур пишакаршиврийн, сянатрайн. Муния хьуну дур СунбатIуллал арамтурал касму.
ХьхьичIа-хьхьичI муххал ххуллул пишакарнал даву лахьхьин Ингилиснавун лавгун ивкIун ур Тамаза тIисса адамина, тиха зана хьуну ур, путевой обходчикнал давугу лархьхьуну. Ванал ппу ивкIун ур Армил тIисса гуржиричу, нину Аймат – СунбатIлиясса хъамитайпа. Тамазал ивкIун ур муххал ххуллул пишалий зузисса шама арс. Муная махъ СунбатIуллал чиваркI занан бивкIун бур Ухссавнил Ккавкказуллал муххал ххуллул станциярдайн. Цалчинсса муххал ххуллул усттар Саймаев Мувти Батайскалий муххал ххуллул станциялий зий ивкIун ур.
Мукунма СунбатIуллал арамтал занан бивкIун бур Азирбижаннал Арабалинск тIисса станциялия тIайла хьуну, Грозналийн бияннин, мастерталну ва бригадирталну зун.
ХьхьичIва-хьхьичI Къуппил Ирбул КIапIкIайлив Муххал ххуллул реальное училище къуртал бувну, Мамедкъалалив, Манасрай мастерну, ламурдал инженерну зий ивкIун ур. Ванал гъанчу Къибал Аьду хъунама мастерну зий ивкIун ур МахIачкъалаливгу, Мамедкъалаливгу.
1930 шиннардий цала кулпатругу бувцуну, муххал ххуллурдай зий бивкIун бур СунбатIлиясса 31 тухумрал агьлу.
Граждан дяъвилул, индустриализациялул, Хъун дяъвилул шиннардий бивхьусса захIматрахлу 1948 -1954 шиннардий 16 сунбатIличу лайкь хьуну ур Совет хIукуматрал бюхттулсса наградалун – Лениннун ордендалун, 7 адаминан дуллуну дур ЗахIматрал ЯтIул Ттугълил орден, 14 инсаннал ларсун дур орден «Знак Почета», орден «Славы», орден «Дружбы», 11 сунбатIличу лайкь хьуну ур «Почетный путевод СССР» тIисса хIурматрал цIанин. КIия сунбатIличунал – Оьмаров Садикьлул ва СутIаев Рамазаннул ларсъссар «Генерал тяги» тIисса хIурматрал цIа.
СунбатIуллал 50-ннаха ливчусса оьрчIал ва душварал къуртал бувну бур Ростовуллал муххал ххуллул инженертурал институт. Ва институтраву 40-ллийсса шиннардий дарс дихьлай ивкIссар сумбатIличу Апаннинал арс Муса МахIаммадов. ЦIанасса ппурттувугу, элмурдал докторгу хьуну, тиккува зий бур ванал душ Наташа.1960 шиная шинмай Ухссавнил Ккавкказуллал Муххал ххуллул МахIачкъалаллал дистанциялул хъунимину зий бивкIссар СутIаев Рамазан ва Адамов Захар (ва ур цIанагу зий). Дарбантуллал муххал ххуллул дистанциялул хъунаману зий Султанов Мяммал хьуну дур 27 шин. Ростоврая Бакуйн нанисса муххал ххуллул ревизорну зий ивкIссар Оьмаров Садикь. Грозналий дяъвилул чIумалгу мастерну зий ивкIссар Мусиев Муси.
МахIачкъалалия Дарбантлив нанисса муххал ххуллий личIи-личIисса шиннардий ревизорталну зий бивкIссар Оьма­ров ХIасан ва Мусалаев Ссапар, МахIачкъалаллал муххал ххуллул вокзалданул хъунаману хъунмасса хIаллай зий ивкIссар Рамазанов АьбдурахIман.
Муххал ххуллул зузалал кьини – ва СунбатIуллал жяматралгу кIицI лагайсса байран кьинир.
СунбатIуллал щарниха

Дирхьуну дур ттул щар
Бяртал ухнилу,
Хъассуха буккайсса
бургъил чаннаву.
Шярава баллай бур
тяхъасса чIурду,
СунбатIуллал хъатIуй
жагьи-жугьулнал.


Бюхттулсса барзунттал
уздансса улчай,
Вирттал язиминнал
талихIрал кIалай.
Бичу, тIутIайх бичу,
ххира СунбатIул,
Чумартнал ша бивзний
сунурдан ххяхху!


АцIния ряхрахъул
Лениннул орден
Хъазамирттав ларчIссар
вил чиваркIуннал.
Муххал трассардай зий,
захIматру бувну,
КIия адамина генерал хьуссар.


Саргъунну бувтуссар
СунбатIлив оьрму,
Шярава къаливчссар
шярайхуккугу,
Совет хIукуматрайн
къаршисса кулак -
Ялун уххул хIурмат
жучIа лавайссар.


Хъинну кьамул байссар
бувкIсса хъамалгу,
Мудан цачIу буссар
щарнил жяматгу.
СунбатIул, СунбатIул,
талихIрал минай,
Муххал ххуллучийтал,
захIматрал агьлуй!
МахIмуд Аьлилов