Август зурул 3-нний Муххал ххуллул зузалтрал кьинир. Гьар шинах август зурул хьхьичIра-хьхьичIсса алхIаткьини, аьдатрайн бувну, СССР дунийгу, тти Аьрасатнавугу, Муххал ххуллурдаха зузиминнал байранни. СунбатIуллал агьалинал профессионал байран хъанахъиссар ва пиша язи бувгьусса сунбатIул чIявусса бунутIий.
ХIазран къаучайссар: «СунбатIличунал кулпатраву арс увайхту, ганал кIукIлу кIану чаннаннил рельсрайн щун байссия» куну.
Мунияту бухьунссар хъун дакъасса СунбатIуллал шярава 30-нния ливчусса муххал ххуллул усттартурал династиярду бусса, 40-нния ливчусса жагьилтурал ва душваврал Ростовуллал муххал ххуллул институт къуртал бувсса. АцIния ряха шяравучунал хъазамрай пар-пар тIий дуссар «Лениннул орден», 7-ннал – «ЗахIматрал ЯтIул Ттугълил орден», 6-ннал – «Дусшиврул орден». «ХIурматрал лишандалул орден», «КIилчинмур даражалул Славалул орден» ларсъссагу буссар. Мукунна 2-ннал «Генерал тяж», 11-ннал – «ХIурмат бусса муххал ххуллучи» тIисса цIарду ларсъссар. Буссар чIярусса медальлу ларсъссагу.
Дагъусттаннай чуври, Аьрасатнавугума дакъахьунссар укунсса бахшишру ларсъсса шяравалу. Ца сунбатIличунал, Манапов Камиллул, Дагъусттаннал Обкомрал секретарьну зузийни, 1943-ку шинал ларсъссар «Лениннул орден».
1960-ку шиная шинай Дзарасов фамилия дусса аьсатIин миллатраясса адамина уссия Ухссавнил Ккавкказуллал МахIачкъалаллал дистанциялул хъунаману. Му пенсиялийн уккайхту, цал СутIаев Рамазан Закаржанал арс зий уссия, цIана Адамов Захар АьбдурахIманнул арс зий уссар, 65 шин хьуссар Дагъусттаннал муххал ххуллул бакIчиталну так сунбатIул зий. Мукуна 20-нния лирчусса шиннардий Дарбантуллал муххал ххуллул дистанциялул начальникну зий уссия Султанов Мямма МахIаммадлул арс.
Совет заманнай «Аьраблинка» тIисса Азирбижаннал станциялия Грозныйлийн бияннин, гьарца станциялий путевод-обходчикну, бригадирну, мастерну сунбатIличу уссия.
РИИЖТ-рал (Ростовуллал институтраву) 50-ку шиннардия шинай зий ивкIссар физикалул дарсру дихьлай, яла хIадур бай отделениялул хъунаману МахIаммадов Муса Апаннинал арс. ЦIанагу ванала душ Наташа, физикалул элмурдал докторнал цIагу ларсун, кафедралул хъунмурну зий буссар.
ХьхьичI ттула, хъирив циняв СунбатIуллал жяматрал цIанияту дакIнийхтуну барча тIий ура Муххал ххуллул пишакартурал профессионал байран, чIа тIий ура цIакьсса цIуллушиву, лахъисса оьрму, давриву, кулпатраву талихI, марцIсса, някIсса ссавнилу, дакьаврил ттугълилу оьрму бутаву.
Ва кьинилуцIун даркьуну дикIанссар, аьпалул хьусса, жул СунбатIуллал шаэр Башир ХIажикьурбановлул «Тамаза» тIисса назмугу.
МахIмуд Аьлилов
Тамаза
Ванияр ттуршлийсса
Шиннардил хьхьичIва
Маэшат бан ппухълу
Лагайсса бивкIссар.
ИвкIссар цагу лавгун,
Тамаза тIисса,
Аьрасатгу бивтун,
Ингилиснавун.
Та чIумал арсвавран
Дулайсса диркIссар
Буттал бутIурая
Хъарас ва ххаржан.
Тамазалгу цала
ОьрчIан кьариртссар
Муххал ххуллул сянат,
Бусравсса касму.
Мунал оьрчIалли тIар
КIапкIайлияту,
Цалчин муххал ххуллу
Буллай авчусса.
Мунал оьрчIалли тIар
Цалчин СунбатIлив
Муххал ххуллул янна
Чурххайнгу лархсса.
Уттирив бакъассар
Шяраву къатта
Акъасса къатлуву
Муххал ххуллучи.
Утти, гьич, къалякъай
Шяраву цучIав
Муххал ххуллий кулунг
Галай къадурсса.
Буссар миннавугу
ЗахIматрал вирттал
Пагьму-гьунарданул
Хъинну паргалсса.
Чаннаннил ххуллурдай
ЗахIматру бувну,
Лениннул орденну
Хъазамрай ларчIсса.
Дуссар жул шяраву
Уттигу аьдат
Ппухълуннал кьариртсса,
Муххаяр цIакьсса –
КIира ччисса тIутIул
Мурадрал шанийн
Муххал ххуллучинал
Кьяпа бутайсса.
Дуссар жул шяраву
Цамургу аьдат,
ИвкIума ласайсса
Буттал шяравун.
Мунах бацIан байссар
Бюхттулсса чару,
Муххал ххуллул лишан
Варакьрай дурсса.
Агь, ххуллул усттартал,
ЗахIматрал вирттал,
Уссания нава
Кьудратрал заллу,
ДацIан давияв зун
На мусил гьайкал
Шяраваллил дянив,
Зиярат буллан.
