Ва сипталул хъунмур мурад бур Аьрасатнал 13 региондалия колледжирттава ва техникумирттава кIункIу буван 4500-ксса студентътал спортрал ва культуралул дянивсса иширттавун. Проект дуллалиссар, жагьилтурал дянив футбол машгьур баврияр ххишала, халкьуннал дянив цашиву цIакь даврил цIанийгу.

Ми масъаларттая гьартану бувсунни «Движение Первых» тIисса ккурандалул региондалул отделениялул хъунмур Людмила Саидовал ва Дагъусттаннайсса футбол ххираминнал (любительский футбол) федерациялул президент Рамазан Гъазиевлул. Проектрал ккаккан бувну бур региондалий футболчитал батIул баврил ятIапрал тIуркIурду, ми байбишинтIий бур октябрьданий. Бяст-ччаллу хьунтIий бур Севастопольлай, Къиримнаву, Ухссавнил Ккавкказуллал республикарттай, Ставропольлал крайрай, Донецкаллал ва Луганскаллал Халкьуннал Республикарттай, мукунма Запорожскаллал ва Херсонскаллал областирдай.
Футболданул тIуркIурду бакъасса, проектрай ккаккан бувну бур сакин буван цаймигу иширттавух хIала-гьурттусса жагьилтурал ккуранну. Регионнай дузал буллан тIий бур фан-клубру, жагьилсса инсантал машхул хъанантIий бур медиаволонтертурал пишалухун, миннал буслан тIий бур футболданул тIуркIурдая видеоканаллай.

«Финалданул шачIанттуй бяст-ччаллий дуккан тIий дур яла хьхьичIунми 16 команда. Ми дарчIуну дикIантIиссар мукьва группалийх. Турнирданул бур цила чемпионшиврул история, уттинин бакIрай ххув хьуну дур Дагъусттаннал каманда, хъиривмур шинал – Ингушетияналсса. Гьашину командартту ччаллий дуклан хIадурну дур. Цалчинмур кIану бугьан хъунмасса тамахI бивхьуну дур Донецкаллал командалул. Дарбантлив хьунтIисса финалданул тIуркIурдайн жу оьвтIий буру профессионалтурал футболданул клубирттал вакилтурайнгу, миннал хъунмур спортравун бучIантIисса оьрчIан лайкьсса кьимат бищуншиврул. Тамашачитуран щала билаятрай сакин дантIий бур циняв тIуркIурдал онлайн-трансляцияртту»,–бувсунни Гъазиевлул.
Дарбантлив финалданул тIуркIурду хьунтIий бур шагьрулул дязаннивсса «Нарын-Къала» стадиондалий. Аьмну финалданийн дурксса 16 командалул бантIий бур 32 тIуркIу.
ХI. Аьдилов