ЦIуссалакрал райондалий «Движение первых» тIисса суккушиндарал гьурттучитал хIала бувххунни «Марафон культур» тIисса Щалагу Аьрасатнал миллатирттал акциялувух. Акциялул лагрулий дуклаки оьрчIал дунни личIи-личIисса аслийсса лакку дукрарду.

ЦIуминалийсса Аьрасатнал Виричув Мутай Исяевлул цIанийсса ЦIуссалакрал гимназиялуву дуклакисса Амина Нугъаевал ва ПатIимат Кьурбановал ккаккан бунни ккунукрал ххункIру байсса куц. Вайннан усттарну ххункIру бан лахьхьин бунни Зурмукат Нугъаевал ва Мариян МахIаммадовал. Буттал буттахъая шийнмай хIакьинусса кьинигу жула лакрал ссупрардай яла нахIумур дукрану ккаллину бур ккунукрал ххункIру.

Буттахъал дуллай бивкIсса хьхьичIарасса дукрарду цуми духьурчангу хъинну чурххан бузсса ва нахIусса дур. Аьдатругу, дукрардугу хъамаритан къариртун, лахьхьин дуллан аьркинссару жула никиран.
Ххуйри, ххаллилли укунсса сиптарду дачин дурну, вайннувух чIавасса оьрчIру ва душру хIала буххан буллалисса сакиншинначитал.

Имара Саидова