Дагъусттаннал Жагьилтурал министерствалул Барчаллагьрал чагъарду буллунни Москавлив апатI хьусса хъамитайпалун кумаг бувсса Дагъусттаннал паччахIлугърал медициналул университетрал 5-мур курсрал студентътал Исмяил Эскендаровлун ва Карина Мутаеван.
Наградартту вайннан дуллунни Регионнал дянивсса кIулшивурттал форумрай.
Ва иш хьуну бур кIива зурул хьхьичI, сентябрьданул 27-нний Москавлив студентътурал форумрайн бувкIсса Исмяиллул ва Каринал ххассал бувну бур «Партизанская» тIисса метролуву рельсирдайн багьсса жагьилсса хъамитайпа. Москавлив цалчин бувкIсса студентътал ЯтIул майдан ххал бан най бивкIун бур «Партизанская» метролуву.
Укун буслай бур та кьини хьусса иширая Карина:
«Метролуву жу цалчин най бияв. Чунмай, цукун бачинссарив луглай бунува, «Кумаг бара» тIий леххаву тIисса чIу бавунни. 20-30 шинавусса хъамитайпа бия рельсирдачIа оьттулгу най. Га бизан, сукку хьун хъанай бакъая. Шокравусса тагьар дия. На навагу, ци зунссарив къакIулну, гьанавиххи хьуну бивкIра. Яла ганичIан тIанкI дав, леххаву тIун бивкIра анаварсса кумаграйн, полициялийн оьвчияра тIий. Амма ттух къулагъас дайсса цучIав акъая. Исмяиллулгу, нагу га гужирай платформалийн гьаз барду. Яла, скамейкалий щябивтун, оь бацIан буллан бивкIру. Га цуппагу хъинну нигьа бувсун бия, гъалгъа тIунмагу хъанай бакъая. Гужрай барчаллагь увкунни жухь. Телефондалувун буруглай бунува, рельсирдачIан бивсса хIисав къавхьуну, апатI хьуну бия. Жу ганил лажин-кагу, яннагу оьттуцIа марцI дуварду. Му чIумал полициялул зузалтгу ялун бивунни. Гайннал оьвкунни душнил гъанссаннайн. Чансса хIаллава Анаварсса кумаграл машинагу бивунни».
Вана укунсса иширайну дакIний личIанссар жула студентътуран Москавливсса цалчинсса аьрххи.
