Январьданул 12-нний Дагъусттаннал ХIукуматрал председатель Аьбдулмуслим Аьбдулмуслимов гьуртту хьунни Аьрасатнал Печатьрал кьинилун хасну Расул Х1амзатовлул ц1анийсса Национал библиотекалуву журналистътуран наградартту дуллалисса шадлугърай.
Премьер-министрнал Дагъусттаннал бакIчи Сергей Меликовлул ва цалагу цIанияту барча кунни журналистътурахь пишалул байран.
«Аьрасатнал Печатьрал кьини – му, кказитирттал, журналлал, луттирду бищай идарарттал, электрон СМИ-рдал зузалтрал байран дакъасса, Интернет-кказитру ккалаккиминналгу байранни.
Ва байрандалул лагма лаган буллалиссар цала захIматрайну цасса информациялул пространство щаллу дуллалими. ХIакьину информациялул пространстволий жучIава ккаккан бувну бур республикалул ва районнал кказитру, телевидение, радио, сетьрал изданияртту, интернет СМИ-ду. Дагъусттаннай зий бур 245-нниха ливчусса бищайсса ва электрон СМИ-ду, итабакьлай бур 140 кказит, миннува 13 — миллатирттал мазурдий.
Махъсса ппурттуву машгьур хъанай бур социал сетьру, микку тIайламур щялмахърая личIи буван къакIулсса инсан аьйкьлай ур личIи-личIисса хаварду ккалаккисса чIумал. Му тагьардануву личIиссара мяъна дур вихшала дишин бучIисса объективсса информациялул. ХIакьинусса кьини ДР-лул СМИ-луща бюхълай бур пишалул лавайсса даражалул стандартру ва буккултрал вихшала дуруччин», – кунни Аьбдулмуслим Аьбдулмуслимовлул.
Ванал барчаллагь кунни журналистътурахь СВО-лул иширттая ва Расул ХIамзатовлул юбилейрая бусаврихлу.
Премьер-министрнал личIину кIицI дунни спецоперациялийн лавгун бивкIсса журналистътурал цIарду.
«Ва байран хъанахъиссар жяматрал оьрмулуву СМИ-лул хъунмасса кIану бугьлай бушиврул мукIрушиннану. На барчаллагь тIий ура журналистътурахь, издательтурахь, медиаиндустриялул циняв вакилтурахь, республикалул лябуккулуву бихьлахьисса захIматрахлу. Дагъусттаннай зузисса чIявуми журналистътал цимилагу ххув хьуссар Щалагу Аьрасатнал ва региондалул конкурсирдай, миннал дур лайкьсса наградартту.
Циняв журналистътуран чIа тIий ура давурттаву тIайлабацIу, бюхттулсса рейтинг, цIуллушиву ва хъиншиву», – кунни Аьбдулмуслим Аьбдулмуслимовлул.
Парламентрал чулуха журналистътал барча бунни ДР-лул ХМ-рал Национал политикалул, жяматийсса ва диннал цачIуншивурттал ва парламентирттал дянивсса дахIавурттал комитетрал председатель Фирутдин Ражабовлул.
Журналистътал барча бунни мукунма ДР-лул Информациялул ва печатьрал агентстволул каялувчи Аьбдуразакь Жамалуттиновлул.
Яла Аьбдулмуслим Аьбдулмуслимовлул журналистътуран дуллунни региондалул ХIукуматрал ХIурматрал грамотартту ва Барчаллагьрал чагъарду.
ХIадур бувссар
ХI. Аьдиловлул
