Москавлив Эдуард Сагалаевлул цIанийсса телевизион премиялул лауреатътал барча бунни. Статуэткарду дуллунни телевидениялул давриву хьхьичIунминнан.

Дагъусттаннал телевидениялий зузисса Мадина Зиркьуева ва Ульяна Мукаилова премиялул лауреатътал хьунни «Лучший режиссёр» тIисса номинациялий. «Дагестан» РГВК-лий ккаккан дурсса «Мамедкъала» тIисса документал журалул фильмрахлу.
Гьунар бусса душвавран статуэткардугу, дипломругу буллунни машгьурсса телеведущий ва журналист Дмитрий Дибровлул.
Щалагу Аьрасатнавасса 258 проект гьуртту хьусса конкурсрай ва хъуннасса хьхьичIуннайшивур.
Мадина Зиркьуева Цалчинмур ЦIувкIратуссар. Итххявхсса журналист, режиссер бакъагу, гьунарду чIявуссар ваниву. Премия ласласисса хIалатраву Мадинал укун увкунни: «Ва жун хъинну агьамсса наградар, хар-хавар бакъасса бала-апатIру ялун бивну, кьини дурксса ппурттуву жу тай иширттал хроника дусса куццуй ккаккан дувансса ниятрай зий буссияв. Жул киносурат тIабиаьтрал зараллаяссар, амма хьхьичI ххуттай му хьунни инсантал куннал кув бугьаврия, чIарав бацIаврия, дусшиврия. ХIалу дагьну дунура, хIакьину ва хъун сахIналия цал уттигу чIарав бавцIуцириннахь барчаллагь учин ччай бур. Кьини дуркминнал чIарав цалчин, гьай-гьай, чIаххул бавцIуна, яла Дагъусттаннал миллатру, яла тIурча, Аьра­сатнал цайми регионная халкь нех дирхьуну букIлай бия».
Социал сетирдайгу ванил премия ласаврил хIакъираву кIицI лавгунни, киносурат ххал дурми, тамашачитурал цала тIийкун, чара бакъа чан-кьаннувагу цайми шайшиву, чIиви-хъунну баххана хьуну буккайшиву ххал дувайхту.
«Жу жувагу баххана хьуссару тай иширттая махъ. ХIакьинусса кьинигу буккан бувар ттул дакIнива тай хажалатрайсса инсанталгу, тайннал буруккинттугу. Съёмкардая махъ, синнааьрщарацIарагу марцI къадурна подсобкалуву дуссар ттул усру. Тай ишругу, историягу ттущалвар буссар ттигу. Бала ялун бивсса чIумал, кумаграл ка тIитIавривур дусса агьалинал алвагьшивугу, ххуйшивугу. Вай хасиятру цIакь хьуннав ялун нанисса никиравугу, бурувччуну лякъиннав Дагъусттангу, билаятгу кIул бакъа балардаща», – тIий бур Мадина.
КIицI къалавгун битан къахьунссар вайннан премия дуллалисса шадлугъ тIайла дарцIушиву Мамедкъалалив къатри щиналу лирчIсса 52 кулпатран цIусса къатрал кIулли дуллалисса кьинилийн. Вагу ца мяъна дусса лишанни, балардавагу лайкьну бувккун, оьрму цила ххуттавун багьлай бушиву мяйжан буллалисса.