Ларгсса нюжмардий Дагъусттаннай хьунни «Голос Евразии» тIисса национал вещаниялул фестиваль. Ряххилчинмур фестивальли ва ВГТРК-лул фестиваль, «Дагъусттан» ГТРК-лул сипталийну, Дагъусттаннал бакIчинал, ХIукуматрал ва Халкьуннал Мажлисрал кабакьаврийну дуллалисса.

Ваний гьуртту хьунни Аьрасатнал 70 региондалиясса делегациярду. Ванил дайдихьу дунни МахIачкъалалив. Фестиваль тIитIлатIисса шадлугърай гьуртту хьунни республикалул Халкьуннал Мажлисрал председательнал хъиривчу Камил Давдиев, цифрардал лябуккулул, информациялул ва печатьрал министр (врио) Юрий ХIамзатов ва цаймигу къуллугъчитал. Вайннал бавтIцири барча бунни Дагъусттаннал бакIчи ­Федор ­Щукиннул ва Халкьуннал Мажлисрал председатель Заур Аскандаровлул цIанияту.
Изображение
Форумрал лагрулий гьаз бунни миллатирттал мазру, культура, аьдатру ядаврил ва гьаз даврил ххуллийсса агьамсса масъалартту.
Форум къуртал хьунни Оьруснал драмтеатрдануву хьхьичIунми журналистътал барча баврийну. Ваний гьуртту хьунни республикалул вице-премьер Рамазан Жяъпаровгу.
Аьрасатнал телевидениялул Академиялул член, ВГТРК-лул гендиректорнал хъиривчу Рифат Сабитовлул кIицI лавгунни ВГТРК-лул Аьрасатнал 57 мазрайсса передарчартту итадакьайшиву, Дагъусттаннай программартту душиву 14 мазрай.
«Миллат яшаврил гьанулий ниттил мазри бусса», – увкунни ванал.

Программалул конкурсрал хIасиллайн бувну, фестивальданул Гран-при ларсунни Дагъусттаннал культуралул лайкь хьусса зузала Тамара Закарьяевал «Бархъал. Хьхьуттайх лархсса эбадатру» тIисса передачалухлу.
Шиккува кIицI лаганну, Тамара Закарьяева, ДГУ-дул дагъусттан филологиялул факультерал лакрал цалчинсса отделениягу къуртал бувну, тания шинмай лакрал радиолий, телевидениялий бюхъулий зий бушиву. Ва даврицIун цамургу ххуйсса даву дуллай буссар Тамара, Дагъусттаннал цIа ххуй чулий гьаз дуллалисса – туристътуран Дагъусттаннал караматсса кIанттурду, тIабиаьтрал ххуйшивуртту ккаккангу дуллай, тарихраягу, культуралиягу буслай экскурсоводнугу зий буссар. ПасихIсса мазрай, цIу буну, магьирну, усттарну дачин дувайссар ванил лакрал мероприятиярттугу.

Цамургу лакку душ, «Дагестан» РГВК-лул журналистка Тамари Аьлиевагу лайкь хьунни фестивальданул цалчинмур премиялун, космонавт Муса Маннаровлул 75 шинал юбилейран хасну дурсса документал киносуратрахлу.
Барча буллай буру жулва гьунар бусса душру, щалагу Аьрасатнал лагрулийсса сий дусса фестивальданул яргсса лауреатътал! ЧIа тIий буру зун цIуллушиву, тIайлабацIу, цIу-цIусса проектру ва цIу-цIусса хьхьичIуннайшивуртту!

ПатIимат Рамазанова