СунбатIуллал шяравусса Гьандаралу ( Бярта ) тIисса зунттулу бур «Бявкъу Щинал щаращи». Бугьараминнал бувсмунийн бувну, 19-мур ттуршукулул 60-70-ку шиннардий кIа щаращуя шяравун щин дурцуну диркIун дур, шанмурцIу бувсса ххялчIал ва синааьрщарал бяшкIанттавух.

Яла махъатугу кIава щаращуя щин дурцуну диркIун дур шяравун.
Амма ми, 65 шинай нанисса щин, гьашину зунттуя лахIуни дагьну дакъа хьуна. Шяраваллил жагьилсса бакIчи Бугъаев Рамазаннул кIа Бявкъу Щаращул щин дурцунни Илларкьадинал бан бувну бивкIсса кьуллалийн. Щаращуй хIавз буван, муруллуйх гьатIа буккан кумаг бунни райондалул Халкьуннал Мажлисрал председатель Оьма­ров Гъази хьхьичIну, шяраваллил чиваркIуннал. Кувссайх тракторданух гьатIа бувккунни цIийширичу Мусттапал.

Турбарду ласунгу, гьатIа буккангу, цемент-къун ласунгу арцу дуллуну дур шяравучу – Гъазиев ХIажикьурбаннул. Шиккува кIицI лаганну, ванал уссил НухIлул СВО-лий ливтIуминнал аьпалул багъгу, тамансса цаймигу чирилунсса давурттугу дуршиву.
Шяраваллил бакIчи Рамазангу, жяматгу барчаллгьрай бур ХIажикьурбаннуйнгу, НухIлуйнгу, цивппа шагьрулий бунугу, мудан буттал шяраваллиха аякьа дуллай бушиврухлу.
Утти жул шяравун оьрмулухунсса щин хьуссар.