Дагъусттаннал ХIукуматрал хъунама МахIаммад Рамазановлул агромышленностьрал комплексрал зузалтрахь, ветерантурахь барча дунни Шяраваллил хозяйствалул зузалтрал кьини.

Ванал кIицI лавгунни, мугьалтту бувккун хъуни-хъунисса захIматшивуртту ялун диярчангу, шяраваллил хозяйствалул зузалт бюхъу-хIарачатрай зий бушиву, ва гьашинусса сентябрь гьаннин 800 азарда тонна ахънилссаннул ва 200 азарда тонна нувщул дартIушиву.
КIицI лавгунни ятту ябаврил хIасиллугу Аьрасатнаву яла хьхьичIунми душиву, аьмну 5 миллиондалия ливчусса ятту бушиву, мукунма лухIи ризкьилул ишгу лябуккулийсса бушиву. Бувсунни дагъусттаннал яттил дикI кьатIаллил билаятирттайн тIалавну душивриягу.
Премьер-министрнал чIурчIав дунни, укун хьхьичIунсса хIасиллу хIакьсса захIматчитурал хIарачат бушиврий, хIукуматралгу ризкьичитуран кумаг бушиврий, цIу-цIусса техника шяраваллаха зузи давриву ва цаймигу хьхьичIуннайшивурттаву.
«Зул кIулшивуртту, опыт, буттал аьрщарахсса ччаву, ятту-гъаттарахасса хIурмат барачат хьунур шяраваллил хозяйство сантирай ва лябуккулий хьхьичIуннай хъанахъиссагу, агропромышленностьрал сектор Дагъусттаннал экономикалул ца яла агьаммурди, региондалул валовой продуктраву ванил бутIа 20 % ххиссар, зул бюхъулия, хIарачатрая хъар хъанахъиссар республикалул агьалинал маэшатгу, багьу-бизугу», – тIий ур МахIаммад Рамазанов.