Шиндайдихьулул гьантрай буттал шяравун, Цалчинмур ЦIувкIрав, иян увкIсса, СВО байбивхьуния шийнай Ватандалул мурадру буручлачисса АьбдурахIман ХIажиев ва ванащал ЦIувкIуллал шяраваллил хъунама Ильдаров МахIаммадрасулгу Ккуллал райондалул бакIчи Шамил Рамазановлул бусраврай кьамул бунни.

Ванал райондалийн аьлтту буккан бувкIсса СВО-лул гьурттучитуращал хьунаакьинсса хIарачатгу бувай мудан, къулагъасгу дувай. Ва ххуллухь райондалул хъунаманал бувсунни цал архIал 3 медаль аьра­личунахьхьун дуллалисса иш асар хьунсса ва пахрулун­сса бушиву. «Чувшиврул пар бусса медальлу АьбдурахIман ХIажиевлул хъазамрал улттуй хьуссар. Барчаллагь вин чувшиврухлу, АьбдурахIман!» – увкунни Шамил Рамазановлул. АьбдурахIманнул хъазамрайсса медальлавун цIана ххи хьуссар «За отвагу» (Аьрасатнал президент Владимир Путиннул указрайн бувну), «За боевые отличия» ва «За воинскую доблесть» (Аьрасатнал Минобороналул указрайн бувну). «Жува жулва вирттаврая пахрулий буссару ва жущава шаймур бувантIиссар вайннал кулпатирттан, цивппа аякьалийн лавсун бушиву чIалачIи буван», – увкунни Шамил Рамазановлул. Вара кьини Цалчинмур ЦIувкIуллал школалий укуна бусравну хьунаавкьунни АьбдурахIман школалул коллективрал, дуклаки оьрчIал ва шяраваллил жяматрал.|

ПатIимат Рамазанова